RINNA CHUAN THILTIHTHEIH LOH NI A LANG CHU HLAWHTLINNAAH A CHANTIR THEI ṬHIN.

#ZONEWS #FIANRIAL AUGUST 27, 2025:
RINNA CHUAN THILTIHTHEIH LOH NI A LANG CHU HLAWHTLINNAAH A CHANTIR THEI THIN.

Vawiin kan fianrial hunah chuan Nehemia’n kulh bang a sak chungchang kha ngaihtuah teh ang. Nehemia chu Persia lalram chhunga an sal pakhat a ni a. Jerusalem leh a chhunga chengte dinhmun khirh tak mai chu a lo hre ta a. Lal Artezerzia duhsakna changin Jerusalem kulh bang siam tha leh turin theihtawpin a hovin hma an la a. Nehemia rinna leh a hruaina hnuaiah ni 52 chhungin bang chu an siam zo thei a ni. Hei hian Pathian venhimna leh a ringtu tana ruahmanna a lo neih dan chiang takin a lang a ni.

NEHEMIAN KULH BANG A SA
Chutichuan kulh chu kan siam a; a san lam chanvein kulh zawng zawng chu kan zawm chhuak vek a; mipuite chuan thawh chakna rilru an pu hle mai a ni (Nehemia 4:6)

Tihtur harsa leh khirh tak mai, tihtheih loh ni hial awma lang i hmachhawn ve tawh em?

Jerusalem kulh bang an sak that leh lai khan, Nehemia chuan tihtur khirh tak leh harsa tak mai chu a hmachhawn a. Jerusalem kulh chhe vek leh ram vek mai dinhmun a hriat khan, Nehemia chuan tap chungin Pathian kaihruaina a zawnga a tawngtai nghal a ni. Jerusalemah hmanruate nena a kir leh lal Artezerzia’n a phalsak dan atang hian, Nehemia tumna, inpekna leh rinna chu a lang chiang hle mai.

Nehemia hruaitu dinhmun kha dodalna tel loin a tluang purh lem lo.

Pathianin tihtur min pek kan tihna kawngah engtin nge hmelmate chu kan hmachhawn ve ang le?

Sanbalata te, Tobia te, Arab mite, Amon mite leh Asdod mite chuan Nehemia hmalakna chu an duh loin nasa takin an dodal a, an vau a, fiamthu thawh nan te an hmang bawk a, nasa takin kulh siamthat tum hnathawktute chu an rilru tihhnual leh tihhlauh tumin an bei a ni. Nimahsela Nehemia rinna chuan a tihtur chauh chu a thlir tir a. Mipuite chu Pathiana rinna nghat tlat tur leh, an thiltihah chuan an mal lo a ni tih hrilhin, an thiltih tura huaisenna an neih theih nan nasa taka fuihin mite chu a tichak a ni.

Dodalna karah pawh kan thiltum chauh chu kan thlir tlat theih nan engtin nge hma kan lak ve ang le?

Nehemia chuan mipuite chu an kut leh lama indona hmanrua kenga, a lehlama hnathawhna hmanrua keng chunga hna thawkturin a ti a, hei hian an thiltih tur leh an hmasawnna chu venhima tihhlawhtlin an tumzia a tilang chiang hle. Pathiana innghat chunga Nehemia thiltihdan hi a pawimawh hle mai. Ni 52 chhung chauhin, kulh bang chu siam zawh a ni a; rinna leh rinna hmanga thil tih hram hram hramnain thil ropui tak a tih theihzia entirtu pawimawh tak ni.

Nehemia chanchin hian, keimahni nun ngeiah pawh, Pathian venhimna leh kan tana A ruahmannate ring tlat thei turin min tichaka, min fuihtu atan i hmang ve ang u.

Eng anga tihtur harsa, khirh leh buaithlak pawh, Pathian nen chuan kan tihlawhtling thei vek a ni tih hria a, kan rinnaa ding nghet tlat thei turin he chanchin hian min tichakin min fuih thar theuh rawh se. Himna leh hlawhtlinna tak tak chu kan thiltih leh tumte Pathian duhdan nena inmila tih mai hi a ni tih Nehemia chanchin hian min hrilh nawn leh a ni.

NGUN TAKIN INNGAIHTUAH ILA!
Vawiina chona kan hmachhawnte hi ngaihtuah teh ang. Hnualna emaw, han tihzel mai harsa ti a, a lutuk deuh ni a hriatte i nei ve em?

Nehemia rinna leh beidawng lova Pathiana rinna nghat tlat chunga a beih hram hramna chanchin hi ngaihtuah vang vang teh ang. Nehemia ang hian, kan vei leh ngaihtuah, kan harsatna leh dinhmunte Pathian hnenah tawngtaiin thlen ila, A venhimna leh A hruaina chu i ring tlat ang u. Beidawng lovin, taima takin thawk zel ila, Pathian chu kan kawng pen tinah a tel ve zel a ni tih i hre reng ang u.

ṬAWNGṬAINA
Aw ka Pathian, he mite tana ka thiltih zawng zawng hi ka thatna tûrin hre reng ang che (Nehemia 5:19).

Aw Lalpa, I malsawmna leh awmpuina ka dawn zawng zawngte ka thlira ka chhiar changin, I fate tana engkim mai I phalzia leh I ui loh zia a takin ka hre chhuak leh thin a. Beiseina nung nei zel thei tura min hualhimnate hi a va ropui em! Jeremia kulh bang ang hian, I fa bo mekte, hloh mekte thinlunga beiseina kulh bang sak pui turin nangin min ko a ni tih ka hria e. Ka nuna nangman tihtur min pek te chona hmachhawn thei turin nang chuan ruahmanna leh venhimna chu min siamsak vek tawh a ni tih ka hria a lawmthu ka hrilh a che. I tihtur min pekte ka tihhlawhtlinna kawnga min tibuai thei aw hrang hrangte chuan ka kal kawng an tihbuai lohna turin Lal Isua hmingin chungte chu ka dodal a ni. Nang chuan ka vela awmte nun siam tha a, an tana kulh bang sa tha turin min ruat tawh si a. Isua hmingin ka dil e, Amen!