Saitual District Tung Grower’s Association te hnenah Tung kunga zam tir turin panhnah (phai pan) nung sa polipot 3000 hlan a ni.

#ZONEWS July 23, 2025: Vawiin khan DRDO Office, Saitualah Rural Development Minister Prof. Lalnilawma’n Saitual District Tung Grower’s Association te hnenah Tung kunga zam tir turin panhnah (phai pan) nung sa polipot 3000 a hlan.

He hunah hian Minister Prof. Lalnilawma chuan thu a sawi a, line department hotute thlawpna zarah panhnah an sem thei chu lawmawm a tih thu sawiin, tung chingtute pawhin an hlawhtlinpui ngei a beisei thu a sawi bawk. Minister chuan tung chin piah lamah panhnah hmangin sum lakluh theih a ni dawn tih a sawi a, hei hian eizawnna kawngah pawh mi tam tak a pui thei dawn a ni, a ti.

Prof. Lalnilawma chuan kuthnathawktute hmasawnna turin sawrkarin a ngaihtuahna a seng thin tih a sawi a, Tung herna khawl tha tak din tura hma lak tum niin, DRDO lamin a khawl bunna tur hmun te tlawhin project te an siam dawn a ni, a ti a. Tung hnuaiah hian aieng, coffee, panhnah bakah thing hmarcha te thlenga an thar theih nan hma lak zel an tum thu a sawi bawk. Minister chuan District Bawrhsap leh line department hotute nen tangkawpin theih tawp an chhuah chuan Tung hmangin Saitual hming an chher thei dawn a ni, a ti.

Vawiin Panhnah tiak semna inkhawm hi Pu V. Laldinsanga, Project Director, DRDO chuan a kaihruai a, Rural Development Minister Prof. Lalnilawma bakah hian Pu Zairemthanga, President, Saitual District Tung Grower’s Association leh Pu Jacob Lalmalsawma, DHO chuan thu a sawi an ni.

Tun dinhmunah hian Saitual District Tung Grower’s Association te chuan R.Z Foundation, Serchhip kaltlangin Galaxy Company, Mumbai ah an hralh thin a. He company nen hian kum thum chhung atan Contract ziah niin, he contract hi 2026 March thlan hian a tawp dawn a ni.