Saitual Multi-Shopping Complex Management Committee an thukhawm

#ZONEWS Saitual, July 24, 2025: Vawiin khan DC Conference Room, Saitualah Multi-Shopping Complex Management Committee chu an chairman, District Bawrhsap ni bawk, Dr. Lalngura Tlau kaihhruainain an thu khawm.

He hunah hian District Bawrhsap Dr. Lalngura Tlau chuan thu a sawi a, building chu enkawltu an awm loh chuan a awngrawp mai thin tih sawiin, Multi-Shopping Complex pawh a chul mai loh nan Management Committee chuan an enkawl a, an vil zui reng a pawimawh a ni, a ti.

Vawiin thutkhawmah hian Multi-Shopping Complex Management Committee te chuan sum dinhmun te an thlirho a, Excise & Narcotics Department te chu PWD Assessment angin a luah man pek ni tawh se tih an rel nghal a ni.

Multi-Shopping Complex hi DC office building hlui niin, Saitual Hmar Veng-a awm a ni a, tun dinhmunah hian Excise & Narcotics Department, District Hub for Empowerment of Women leh One Stop Centre ten an luah mek a, Saitual Adventure Club te chu luah turin an inbuatsaih mek bawk a ni.

Vawiin thutkhawm hi Dr. Lalngura Tlau, Chairman, Multi-Shopping Complex Management Committee & DC in a kai hruai a, Multi Shopping Management Committee member te an tel a ni.