Saitualah District Planning Committee thu khawm

#ZONEWS Saitual October 13, 2025 : Vawiin khan DC Conference Hall, Saitualah, Saitual District Planning Committee chu an chairman, District Bawrhsap ni bawk, Dr. Lalngura Tlau kaihhruainain an thu khawm.

He hunah hian District Bawrhsap Dr. Lalngura Tlau chuan thu a sawi a, department hrang hrang hotute chu Mizoram District Transformation Programme hnuaia District Baseline Profile te, District Transformation Vision te leh District Catalytic Intervention Plan te siam tura an inhrilh tawh angin buaipui hma turin a chah nghal a.

Bawrhsap chuan 2026-2027 project atana proposal siam kawngah pawh inring lawk hma turin department hotute chu a chah a. Ruahmanna (planning) siam chu a harsa lai tak a ni tih sawiin, thenkhat chuan an tawp san mai thin a ni, a ti a, department hotute chu tawp san mai lo a, ngaihtuahna fim tak hmang a, district tana tha ber tur leh khawtlang tana hmasawnna thlen thei tur ngaihtuah chhuak turin a sawm nghal a ni.

Pi C. Lalnunsiami, SRO-cum Under Secretary, P&PID leh DPC Member Secretary ni bawk pawhin thu sawiin, Ministry atanga fund lo kal dan te a sawifiah a, department hotute chu sawrkar scheme hrang hrang te zir chiang thin tura chahin, P&PID website-ah te pawh chhiar tur a awm a ni, a ti. Pi C. Lalnunsiami chuan kalkhawmte chu an mamawh hrang hrang te chhinchhiah a, dahkhawm turin a chah a, a vaiin hlawhtling thei lo mah se, a pawimawh dan a zirin fund bang awm atang tein hmalak dan kawng a awm theih tur thu a sawi.

Mizoram District Transformation Programme hnuaia department hrang hrangin District Baseline Profile, District Transformation Vision leh District Catalytic Intervention Plan an siam te chu DC Office-ah thla 2 chhungin an thehlut ang a, DPC-in thutkhawmna neiin an ngaihtuahho leh ang. DPC-ina pawmpuite chu State level-ah thehluh a ni ang a, hemi zawh hian Ministry level-ah hma lak tur a ni.

Vawiin thutkhawm hi Dr. Lalngura Tlau, DPC Chairman & DC chuan kai hruaiin, Pi C. Lalnunsiami, SRO-cum Under Secretary, P&PID, DPC member secretary ni bawk chuan thu a sawi a. Department hrang hrang hotuten 2026-2027 atana project proposal awm te sawi zauna leh sawifiahna hun an hmang a, Article 275(1), PMJVK leh DAJ- GUA hnuaia project proposal lut te Committee hian a ngaihtuahho bawk a ni.