Saitualah Prof. Lalnilawma MLA Trophy Saitual District & 9 Tawi AC Inter Village Football Tournament 2025 hawnna neih a ni

#ZONEWS Saitual August 05, 2025: Saitual District Football Association huaihawt Prof. Lalnilawma MLA Trophy Saitual District & 9 Tawi AC Inter Village Football Tournament 2025 Independence Day lawmna ni pah a neih tur chu nizan dar 8:00 khan Keifang Venghlun YMA Zawlbukah khuallian, Minister of State, Tawi bialtu MLA ni bawk Prof Lalnilawma’n a pet hawng.

Khuallian Minister Prof. Lalnilawma chuan SADFA hruaitute leh hun hmang tura kalkhawm zawng zawng te chibai bukin an hun hman chu lawmawm a tih thu leh infiamna lama a hun tawng san ber te zinga mi a ni tih a sawi. Khuallian chuan SADFA hruaitute inpekna chu chhuanawm a tih thu leh hun hmang tura mi thahnem tak an kalkhawm thei te, inel tur VC Team 22 lai an sawm chhuak thei chu thil awllai a ni lo, a ti. Minister chuan Tawi huam chhung VC team an tel kim thei leh District chhung VC team thahnem tak an tel chuan District dang hruaitute nena khaikhin pawhin SADFA hruaitute chu an hmalakna atangin an tha tawk a ni, a ti a, Tournament tel tur chuan tan rual a ngai tih sawiin, team enkawl nan sum tam tak sen pawh inhuam khawtlang hruaitute inpekna chhuanawm a tih thu a sawi bawk.

Khuallian chuan football hi infiamnaah chuan a ngaihhlut ber a nih thu leh School, College, University a kal lai chuan Club ah te a khel ve thin tih a sawi a. Football tui mi tan chuan hlawh nei lo pawhin a khelh viau theih a, tunah chuan thalai tam tak state danga eizawn nan hmanga hlawh tha tak tak nei Mizoramin a chherchhuak chho ta, he tournament pawh hian infiammite tan hmasawnna, inzir zelna leh eizawnna hring chhuak se a duh thu a sawiin, infiamna hrang hrang ti thinte chuan thian tha siam nan an hman thin angin inkhel turte pawh inthian thatna leh inpawh tlan nana hman tum turin a chah a, ruihhlo leh infiamna chu a kal kawp thei lo tih hre reng turin inkhel turte chu a chah a ni.

Thalaite tan tournament an buatsaih thei hi Sawrkar, District Administration leh SADFA tan a hlu tih sawiin, tun hi a tawpna nilo a tangho zel turin kalkhawmte a sawm a, thalai tam tak tel theihnaah hi chuan theih tawp chhuah zel a tum tih a sawi bawk.

Tournament khel tur players ten rilru thianghlim tak nen chak ber nih tuma in elna hmachhawn turin a fuih a, chutih rualin chak lo zawk nih pawh thiam turin a chah a, tournament tluang tak leh hlawhtling taka hman a nih theih nan inkhel tur leh mawhphurhna hrang hrang nei zawng zawng te a duhsakna a hlan a ni.

Hun hmannaah hian SADFA President Pu Lalbiakvela Royte in inlawmna thu a sawi a, hunserh hi DUDO Pu Laldinsanga Hnamte SADFA Adviser in a hmang a, SADFA Honorary Secretary Pu Lalmuanpuia Hmar in report pein SADFA din tirh atanga thil chhinchiah tlak tak tak an neih te powerpoint presentation hmangin a tarlang a, Saitual Dist VC Association President Pu J Thangzuala’n thu a sawi a, Tournament Secretary Pu C. Rosangzela kaihruainain thutiam(oath taking) neih a ni a, SADFA Sr. Vice President Pu Buangkhuma’n lawmthu sawiin hun a khar a ni.

Hun hmannaah hian Saitual Bawrhsap Dr. Lalngura Tlau, Saitual SP Pu Gaurav Tyagi te bakah sawm bik Saitual District atanga ISL khel mek leh khel thar tur Zothanmawia, Lamzawl Khua, Kerala Blasters FC leh Zothanpuia Saitual Venglai, Mumbai City FC Player te, Sawrkar Department hotute, khawtlang hruaitu, NGO hruaitute, khaw hrang hranga VC Team players leh enkawltute, thuthar thehdarhtu ten an tel pui a, hun hman zawh hian Manager inhmuhkhawmna hman chhunzawm leh a ni.

He tournament hi August ni 5 thawhlehni atangin Keifang Centenary Sports Complex-a khelh tan tur a ni a, vawiin hian Match 3 khelh tur niin a hmasa berah 9:30 Phullen VC  Vs Changzawl VC, 11:45 Mimbung VC Vrs Lenchim VC, 2:00 Saitual VC 1 Vs Tlangnuam VC ten an khel ang.