Sakawrhmuituai tlanga skywalk leh Chaltlang leh Durtlang inkara ropeway siam chungchanga thubuai chhui zawh hun tur hriat a ni lo.

Swadesh Darshan hnuaia Sakawrhmuituai tlanga skywalk leh Chaltlang leh Durtlang inkara ropeway siam chungchanga thubuai chu Mizoram Lokayukta thupek angin Anti Corruption Bureau (ACB) chuan a chhui mek a, chhui zawh hun tur hriat a la ni lo.

Mizoram Tourism Department thuchhuah tarlan danin Swadesh Darshan 1.0 hnuaiah hian project pahnih a awm a, ropeway leh skywalk te hi project hnuhnung zawk “Development of Eco-Adventure Circuit” hnuaia hna 152 zinga mi an ni. Ropeway hi Durtlang site hnuaia hna 16 zinga pakhat a ni a, Skywalk hi Sakawrhmuituai Tlang site hnuaia hna 19 zinga pakhat a ni.

Department hotute sawi danin he Project atan hian Central sawrkarin Cheng nuai 4953.10 a pechhuak tawh an ti a, a project bultanna atan kum 2017 March thla ah cheng nuai 1981 pe chhuakin kum 2017 september ah cheng nuai 2482 a pe chhuak in kum 2018 september thla ah cheng nuai 489 pek chhuah a ni.

Hna hrang hrang thawh nan hian cheng nuai 9907 ruahman a ni a, heng zinga za zela 50% chu pek chhuak tawh niin thubuai tam tak a awm avangin sawrkar laipui chuan kum 2023 december thla khan he project hi alo ti tawp tawh a ni.

Tourism Department thuchhuah tarlan danin kum 2019 April chhunga pawisa pekchhuah zingah Skywalk a awm ngei an ti a, hnathawk turin contractor pahnih JV NEIP & Ropeway & Resorts Private Limited leh Lushai Engineer te chu rawih an ni a, contractor hian bill an lak tawh bakah heng bill te hi kum 2017 atanga kum 2019 chhung khan pekchhuah vek an ni.

Hetihlai hian Sawrkar hmasa hunlaia Tourism Minister Robert Romawia Royte chuan Tourism Department thuchhuah chu a dik tawkloh thu a sawi a, an sawrkar hunlaia sum pekchhuah zingah Skywalk a tel ve loh thu sawiin sum dang erawh an pe chhuak a ti a, ACB file ah chiang zawkin a awm tih a sawi bawk.

#zonews #chanchinthar #tualchhung