Serchhip DC hoin PARAKH District Level meeting neih a ni

#ZONEWS Serchhip October 24, 2025: Vawiin khan PARAKH District Level Dissemination Committee chu Serchhip DC Meeting Hall ah an Chairman Pu Paul L Khuma hoin an thukhawm.

PARAKH Rashtriya Sarvekshan-ah hian Serchhip District chu Mizoramah a sang pawl a ni a. Amaherawhchu, ram pum huapa tehna National Level ah an hniam tih hmuh a ni a. Vawiin meeting-ah hian a chhante sawiho niin tan lak dan tur hrang hrang te an sawiho a ni.

PRS inpuahchahna atan Stage-wise Tentative Training nei tura ruahmanna siam ni se tiin meeting chuan a rel a. Hetah hian training hlawk zawka an neih theih nan Stage tin (High School, Middle School & Primary School) te hi hlawm 2-a ṭhen a ni anga, subject-wise a training hi kalpui tum a ni.

PARAKH (Performance Assessment, Review and Analysis of Knowledge for Holistic Development) test hi National Council of Educational Research and Training (NCERT) leh Ministry of Education hnuaia din niin National Education Policy 2020 (NEP 2020) hmalakna pawimawh tak pakhat a ni a. India ram pumah zirna sikul ten hma an lo sawn a, zirlai bua inziak ang ang naupangten an vawn (by-heart) piah lamah hriatthiamna thuk zawk leh a taka an hman tangkai theih tura zirna kalpui a, chhawr tlak thiamna pe chhuak thei tura zirna kalpui chu a tum ber a ni a; naupangte thiam thil (skill) zirtir leh tihpun lam a kalpui uar hle a ni. PARAKH tehfung inang tlang siamin, India ram puma zirna school zawng zawngah pawl 3, pawl 6 leh pawl 9 zirlaite thiamna teh (assess) thin a ni.

Vawiin meeting ah hian Serchhip District a Education Officer te, DIET hotute leh mi pawimawh dangte an tel a ni.