Serchhip District Export Promotion Committee an thukhawm

#ZONEWS July Ni 25, 2025 Zirtawpni: Vawiin khan Serchhip District Export Promotion Committee chu an Chairman Pu Paul L Khuma hoin Serchhip DC Meeting Hall-ah an thukhawm.

Serchhip District chhunga cheng ten an thil thar chhuah leh siam chhuah hrang hrang te man man zawka an hralh chhuah theihna tura ruahmanna duang turin he Committee hi an thu a. District Commerce and Industries Officer Pi Lalchhanhimi chuan powerpoint hmangin ruahmanna an lo duan chhin tawh te a tarlang a. Serchhip District mipuite thar chhuah a bikin hmarcha, dragon fruit, balhla, sawhthing, lakhuihthei te thawnchhuah dan tur rel niin he meeting-ah hian DoNER Ministry hnuaia North Eastern Region Agri-Commodity E-Connect (NE-RACE) aiawh te an tel bawk a. Awlsam zawka loneituten an thil thar chhuah an hralh theih dan tur huamzau taka ngaihtuah a ni.

NE-RACE hian portal leh smartphone app neiin Farmers Producer Organizations (FPOs) te, loneitute, Self-Help Group te, thei leh thlai sawngbawlna company te, sumdawngte inziahluh theih a ni a. Serchhip District chhunga loneitute pawhin he app hi an hman tangkai theih dan tur zawn ni se, tiin meeting ah hian an rel a. Rawtna hrang hrang vawiin meeting-a an neih te leh kum 5 kalta chhunga loneitute thlai thar chhuah leh hralh dan kalhmang (trent) thlir chunga ruahmanna thar siam ni se, he ruahmanna hi August thla chhunga peihfelin thlirho leh ni se tiin an rel a ni.

Vawiin meeting-ah hian District thuneitute bakah Agriculture, Horticulture leh line department dangte an tel a ni.