Serchhipah ‘Police Commemoration Day 2025’ hmang

#ZONEWS Serchhip, October 21, 2025: Vawiin khan Serchhip SP Office tualzawlah Serchhip SP Pu Gavit Gogna hovin Duty laia nun chan ta police martarte hriatrengna ni – Police Commemoration Day neih a ni.

Serchhip SP Pu Gavit Gogna chuan duty laia ram tana nun chantate chu India sawrkarin a hriatreng thu sawiin, chawimawina leh zahna chibai a buk a. November ni 29, 2007-a Chhattisgarh State-a Naxalite hel laka nunna chan ta Biakrotluanga, Serchhip Venglai, 2nd IR Batallion chu zahna chibai a buk a. Amah hmangaihtu a chhungkua, Serchhip mipuite leh a thawhsak ram tan a nunna hlu tak a hlan a ni, SP chuan a ti.

September ni 1, 2024 atanga August ni 31, 2025 inkarah India ram hmun hrang hranga Central Armed Police Force (CAPF) leh State Armed Police Force (SAPF) zingah Duty laia nunna chan mi 191 an awm a. Mizoram State-ah erawh nunna chan an awm lo a ni.

He hunah hian Serchhip Additional SP Pu H Lalduata chuan Biakrotluanga (L), Constable No: C/122, 2nd IR Battalion martar dan chanchin a chhiarchhuak a. Chhattisgarh State chhung Konta hmunah Naxalite hel laka mipuite venghim tura an duty laiin E-Coy Headquarters huamchhung Muraliguda khuaa an tlan laiin Naxal helpawlte hian kawnga bomb an phum ruk chu khawl hmanga an lo tihpuah avangin an motor-a chuang zawng zawngte chu ka pawh chhawn lovin an thi nghal vek a ni.

Duty laia nun chan ta police martarte hriatrengna ni ‘Police Commemoration Day 2025’ Serchhipa hmannaah hian Serchhip Police thahnem tak an tel a. Martar Pu Biakrotluanga chhungte an tel bawk a ni.