SIAHAAH KMMTTP ROAD LEH BAIRABI- SAIRANG RAILWAY LINE IN NGHAWNG A NEIH THEIHTE ZIRHONA NEI

#ZONEWS Siaha December 18, 2025 : Vawiin khan Kaladan Multi- Modal Transit Transport Project (KMMTTP) Road leh Bairabi- Sairang Railway Line – in Socio, Cultural leh Economy lama nghawng a neih theih dan te zirhona Seminar Hall, Govt. Siaha College- ah neih a ni a. He hunah hian Pu S. Lalremthanga , Dy. CEM, MADC chuan khuallian niin a hmanpui.

Pu S. Lalremthanga chuan hmasawnna hian a tha leh tha lo zawngin nghawng a nei fo tih hriat a tul a,a tha lam chauh ni loin, a tha lo laiah engtia lo inven tur nge tih hriat a tul hle a ni, a ti. KMMTTP kawngpui hian Lai leh Mara District – ah nghawng a nei lian ber dawn tih tarlangin, hemi atan hian lo inbuatsaih thiam a tul hle a ni, a ti. Sumdawnna lian tak tak kalpui a nih dawn avangin, a tha zawng a lo hman a tul a, Khawtlang nun, Sakhuana leh hnam ziarâng tichhe thei lak a fihlim turin mitinin mawhphurna an nei a ni, a ti.

Khuallian chuan KMMTTP kawngpui leh Bairabi- Sairang Railway Line-hi a tangkai zawnga hman a nih loh chuan chhungkaw tam tak tan harsatna leh buaina a thlen thei dawn a, chutiang dinhmuna ding lo turin Sawrkar, Kohhran, NGO leh Mipuite thawhho leh tanho thiam a tul hle a ti . A bik takin thalai nunah nghawng a nei nasa dawn a, kan tu leh faten a tha zawng leh hlawkna tak tak an neih theihna tura zirchianna tha taka neih a tul thu a sawi a. A tha lai leh tha lo lai chungchangah mithiam zawkte zirtirna ngaihven a tul thu tarlangin Pu S. Lalremthanga chuan KMMTTP kawngpui leh Bairabi- Sairang Railway Line- chu ram leh hnam hmasawnna thlentu a nih theih nan a a tangkai zawnga hmangtu ni turin kalkhawmte leh Siaha mipuiten a sawm nghal bawk.

Pu Abraham Beirazi Khithie Addl. DC chuan ‘Awareness Campaign ‘ sawizauna neiin, District hrang hrangah zirhona neih a nih thu a tarlang a. KMMTTP kawngpui leh Bairabi- Sairang Railway Line – in Mizoramah nghawng a nei nasa dawn hle a, A bik takin Siahaah pawh nghawng a nei nasa dawn hle a ti. Sumdawnna lian tak kalpui a nih dawn avangin, lo inbuatsaih a tul hle a, Mipuiten a hlawkna tel turin rilru lo siam lawk a tul hle a ti . MADC leh NGO – ten ngaihsak a tul a, thawkho thiam tur leh Siaha mipuiten hlawkna tak tak an neih theih nan a theihtawp chhuahpui turin a sawm nghal a ni.

Pu Zomuana, Study Committee Member leh Resource Person nibawk chuan Kaladan Multi- Modal Transit Transport Project (KMMTTP) Road leh Bairabi- Sairang Railway Line – in Socio, Cultural leh Economy lama nghawng a neih theih dan lawng hrang hrangte zirtirna leh sawizauana a nei a. Zawhna leh chhanna hun tha tak hman a ni bawk.

Vawiin hun hmanna hi ‘Committee to Study the Socio, Cultural and Economic Impact of the KMMTTP and the Railway Line from Bairabi to Sairang. Government of Mizoram, in association with District Administration Siaha and Internal Quality Assurance Cell, Govt. Siaha College ‘ tangkawp buatsaih a ni a. Siaha District chhunga Official leh NGO – te an tel kim tha hle a, Pi Femina Hlychho, Associate Professor, Govt. Siaha College chuan kalkhawmte lawmna thu sawiin, Pi Zorinsangi, SDC chuan lawmthu sawina neiin hun a khar.