RBI-IN MIZORAM FINANCE DEPARTMENT OFFICER-TE TAN WORKSHOP A BUATSAIH

#ZONEWS Aizawl December 18, 2025 : Reserve Bank of India (RBI) chuan December ni 15 – 17 inkar khan Mizoram sawrkar hnuaia finance officer-te tan government banking leh accounting chungchang zirna tur workshop a buatsaih a. He programme hi sawrkar sum enkawlna, accounts kalphung, digital payment system, cash management leh public debt management lamah state sawrkar official-te hriatna leh thiamna tihzau nana ruahman a ni a. Workshop hi chhawng hniha neih niin, chhawng khatna hi Mumbai RBI office hnuaia ‘Department of Government Banking & Accounts’ (DGBA) ah neih a ni a. Chhawng hnihna hi Nagpur-a RBI hmunpui ‘Central Accounts Section’ (CAS) ah neih a ni.

DGBA, Mumbai-ah hian Central leh State sawrkar tana RBI chu banker an nih dan chungchangte zir niin, RBI hmalakna lian tak ‘E-Kuber’ khawl hmanga ‘E-Payments’ leh ‘E-Receipts’ kalpui dante, sawrkar laipuiin CSS sum pekchhuahna atana kalphung thar a duan, ‘SNA SPARSH’ chungchang te leh Open Market Borrowings (OMB) an kalpui dante inzirtir a ni a. CAS, Nagpur-ah hian RBI-in India ram puma ‘Inter-governmental transactions’ an kalpui dan te, central sawrkar leh state sawrkar hrang hrang accounts an vawn dan te, RBI in Bond market a state-te tan investment a kalpui dan te leh Consolidated Sinking Fund leh Guarantee Redemption Fund hmanga sum enkawl a nih dante zirtirna neih a ni a. Heng hmalakna tharte hian sawrkar sum vawn dik leh sum enkawl chungchangah hmasawnna a thlen beisei a ni.

RBI hotute chuan Mizoram chu tun hnaiah an Overdraft loh thute sawiin, state hrang hrang zingah cash management-ah a che tha pawl an nih thu an tarlang a. State IFMIS kaltlanga E-Payments-ah hmasawnna an hmuh hnem rualin E-Receipts ah tan lak a ngaih thu te an sawi bawk a. Mizoram official-te chu SNA SPARSH atana hman tur RBI account rang lama siamsak an tum thu hrilhin, system thar hrang hrang hman a nih avanga state-ten harsatna an tawh chungchangah thawh ho a, chinfel vat an inpeih thu an sawi bawk a ni.

RBI Chief General Manager Pu Sivakumar Bose, General Manager hrang hrangte leh staff dang ten presentation pe in hun an hmang a. Mizoram sawrkar aiawhte hi Pu Rosiamliana, Deputy Secretary, Finance Department chuan a ho a ni.