Sialhawkin Lakhuihthei Qtl. 2500 an hralh tawh

#ZONEWS August 06, 2025: Khawzawl District a awm Sialhawk khua chuan kuminah hian Lakhuihthei Quintal 2500 an hralh chhuak tawh a, kawng chhiat vangin Guwahati a Aromatic Company-ah erawh Quintal 400 vel chauh an hralh thei a ni.

Sialhawk khua hian tunlai hian Lakhuihthei hralh chhuak mek zelin vawiin thleng khan Quintal 2500 an hralh tawh a. Guwahati Aromatic Company nen inremna lo siam tawh mahse ruah tui tla tam vanga kawng chhia vangin June thla tawp lama Quintal 400 an hralh bak an thawn belh thei lova. Kumina Quintal 2500 an thar chhuah tawhah Quintal 2100 vel chu khaw chhehvelah te zuar kualin an hralh a, Lakhuihthei hi tunah hian Kg. 1 Rs. 10/- in an hralh a ni.

Tarlan tawh angin Sialhawkah hian Lakhuihthei ching hi chhungkaw 240 velin an ching a, nikum khan Quintal 1400 vel an hralh chhuak a ni.