STATE LEVEL COMMITTEE ON STANDARDIZATION MEETING VAWI HNIHNA NEIH A NI

#ZONEWS July 17, 2025: Vawiin khan State Level Committee on Standardization chu an Chairman Pu H. Lalengmawia, Chief Secretary hovin Secretariat Conference Hall, MINECO-ah an thukhawm a, Mizoramah Bureau of Indian Standards-in sector hrang hranga inkaihruaina dan a siamte chak zawk leh tha zawka hlenchhuah a nih theih dan tur an rel.

SLCS Chairman Pu H. Lalengmawia chuan Standardization chungchang chu thil pawimawh tak a nih thu sawiin, sawrkar, mipui, sumdawng leh consumers-te tana hriat makmawh thil a nih thu a sawi a. Anuj Bhatnagar, Deputy Director General, BIS hnen atangin BIS hmalakna hrang hrangte report ngaihthlak a nih hnuin Mizoram tana hmalakna awm thei hrang hrangte sawi ho a ni.

Thupui sawi ho zinga langsar zualte:

• Mizorama Industry-te dinhmun zir chianna ‘Mapping of Industrial Landscape of Mizoram’ neih leh data mumal zawk neih.
• Bungraw leh thil leitu ten ISI chuangte awlsam zawka an hriat theihna tur leh thuneitute hnena awlsam zawka complaint an thehluh theihna tur atana duan, Mobile application – BIS CARE App chungchang mipuite hnena puanzar.
• Village Council ten BIS inkaihhruaina siamte tha zawka an zawm theih nana hmalakna ‘Sensitization of Village Councils’ chungchang.
• Sawrkar mi pawimawhte tan, sawrkar hmalakna Govt. Schemes leh programmes hrang hrang kalpui danahte Indian Standards zawm that a nih theih nana intuaihriamna ‘Capacity Building of Government Officials’ neih chungchang.
• Administrative Training Institutes-hnuaia training programme-ah Public Administrator tha leh rintlak chher chhuah a nih theih nan training module-ah ‘Standardization and Quality Ecosystem’ telh chungchang.
• BIS-in Officer kum 35 hnuai lamte tana a buatsaih thin, Manak Pravardhak – Young Professionals Programme, National Institute of Training for Standardization (NITS), Noida-a neih thina tel ve dan ngaihtuah.
• Sawrkar bungrua leh thil dangte dik taka lei a nih theih nana State Procurement Policy-a BIS-in inkaihhruaina dan a siamte zawm.
• In sak dan tha zawk leh him zawk a awm theih nana BIS-in National Building Code a duante chak zawka kalpui tura hmalak.
• Sawrkar Office leh Damdawi Inahte, mipuite nena indawrna felfai leh tha zawk a awm theih nana Quality Management Systems – ISO 9001 kalpui.
• Zirna In leh Sikul (public/private) te tana BIS Sponsored ‘Standards Clubs’ din chungchang; Mizoramah tun dinhmunah sikul 4 chiahin an la din thu leh BIS Standards Club din tura BIS Guwahati Branch biakpawh theih a nih thute leh thil dangte sawi ho a ni.

Thupui hrang hrangte sawi ho a nih hnu hian Pi Teresa Vanlalhruaii, Secretary, Food Civil Supplies and Consumer Affairs (FCS & CA) chuan lawmthu sawiin hun a khar a ni.