STUDY TEAM ON ESTIMATION OF DPR, GST COLLECTION, CONTRACTOR PROFIT DEDUCTION & COMMITTED LIABILITY TEN AN REPORT CHIEF MINISTER HMAAH SAWIFIAH

#ZONEWS Aizawl December 18, 2025 : Vawiin khan CM Conference Hall-ah sorkar leiba (committed liability), Detail Project Reports fel fai zawk, GST lakkhawm dan chak zawk leh a kaihhnawihte zirchiangtu, Pu TBC Lalvenchhunga, Adviser to CM kaihhruai chuan an rawtna te Chief Minister hmaah an sawifiah. 

Chief Minister chuan, Study team te thawhrimna a fak a, an rawtnate chuan kalphung thar tha zawk min pe dawn a, eirukna a veng dawn a, GST lakkhawm lamah min pui dawn a, hmasawnna hnathawh a chak sawt dawn bawk a, hman theiha peih thuai a ngai a ni, a ti.

Department leiba (Committed Liability) te chu khuarei thilte an lo ni a. Tuna a awm tawhsa hi chu study team rawtna angin kan kalpui ang a. A awm leh tur hi chu kan veng tur a ni, a ti.

Study Team Chairman Pu TBC Lalvenchhunga’n report a pe a. An rawtnate hi pawm vek a ni.

Leiba rulh ngaite chu a tahtawl (phase wise) a rulh an rawt a. PWD in Rs. 5.83 Crore a la nei a, tun financial year kal meka tihfel an rawt a. P&E Department-ah Rs. 12.62 Crore a la awm a, financial year vawi hnih (kum hnih) chhunga rulh an rawt a, PHE Department-ah Rs. 58.07 Crore a la awm a, sorkar kum thum (three financial year) chhunga rulh an rawt a ni. Heng hna thawktute hian GST an tifel ngei ngei tur a ni ang. Works Department pathumin leiba an la neihte hi GST hman hnua mi vek an ni.

Hetiang leiba tang hi a awm zui tawh loh nana hmalak dan turte pawh an duang a. Emergency Works thawh a lo tul anih pawhin phalna lak zel tawh tur a ni ang.

Study team hian hmasawnna hnathawhna leh GST lakkhawmna kawnga rawtna te, Detail Project Report siam dan inang tlang neih dan turte, PWD SOR ennawnte leh rawtna dang eng emaw zat a nei a. A taka hman theiha peih thuai a ni ang.

Meetingah hian Pu F. Rodingliana, Minister, P&E, Prof. Lalnilawma, Minister, PHE leh Pu Vanlaldina Fanai, Planning & Finance Commissioner bakah Works Department hotute, Taxation Department official pawimawhte an tel a ni.

Attachment