Swasth Nari, Sashakt Parivar Abhiyan (Healthy Woman, Empowered Family) leh ‘8th Rastriya Poshan Maah (8th National Nutrition Month) Campaign tha taka zawh fel a ni.

#ZONEWS Aizawl October 3, 2025 : September 17, 2025-a India ram puma Swasth Nari, Sashakt Parivar Abhiyan leh 8th Rastriya Poshan Maah Campaign Prime Minister Pu Narendra Modi-a’n Dhar, Madhya Pradesh atanga a hawn chu zawhfel a ni ta. Mizoram-ah pawhin Prime Minister-i’n a hawn rual hian Mizoram Larsap General (Dr) Vijay Kumar Singh, PVSM, AVSM, YSM (Retd) in State tan a hawng ve thung a, he Campaign hawnna-ah hian Health & Family Welfare Minister Pi Lalrinpuii pawh a tel nghe nghe a ni.

He programme hlawhtling taka kalpui a nih hnuah khar a nih takah hian Health & Family Welfare Minister, Pi Lalrinpuii chuan ram chhung hmun dang ruala hmeichhiate hriselna tur campaign pawimawh tak Swasth Nari Sashakt Parivar leh Poshan Maah Mizorama kalpui a nih danah thawktu te thawhrimna leh taimakna a fak thu sawiin mipui ten hlawkna an chan ngei a duhsak thu a sawi a. Campaign hlawhtling taka neih a nih avangin VC/LC, NGO leh Kohhrante thawhpuina leh tanrualpuina ah lawmthu a sawi bawk.

Dr. Lily Chhakchhuak, Mission Director, NHM, Health & Family Welfare chuan Swasth Nari, Sashakt Parivar campaign-in a tum ber chu chhungkaw nu ber atanga tana hriselna bultan a ni a ti a. Hemi hnuaiah hian September ni 17 atanga October ni 2, 2025 chhung hian hmeichhiate hriselna lam hawi campaign kalpui niin, Hospital hrang hrang, Health & Welness Centre leh Health Sub-Centre-ahte health camp leh check-up neih a ni a. PMJAY, PMMVY leh Nikshay Mitra enrollment kalpui a ni a, Ayushman Bharat Health Account (ABHA) ID siam a ni bawk. Naupang vaccine pek, BP sang, zunthlum, hnute cancer, anaemia leh TB vei zawn chhuah bakah AYUSH awareness, Oral health leh Blood donation camp-te buatsaih a ni a. 8th Rastriya Poshan Maah kaltlangin nu leh naupangte hriselna nan hmalakna hrang hrang nasa kalpui a ni bawk.

He Campaign chhung hian Health Camp vawi 4224 neih a ni a, Special Camp vawih 627 neih a nib awk. Campaign chhung hian Mipui 73,847 te hriselna endik niin heng zinga 38145 te chu hmeichhia an ni. He Camp chhung hian hetiang hian Natna chi hrang hrang an vei leh veiloh endik an ni;-

1. Diabetes – 38,424 (Mipa – 17938 leh Hmeichhia- 20486)

2. Hypertension – 42,519 (Mipa – 18701 leh Hmeichhia -23818)

3. Oral, Breast & Cervical Cancer – 29,180 (Mipa – 13,078 leh Hmeichhia-16,102)

4. TB – 32,423 (Mipa – 16,013 leh Hmeichhia-16,410)

5. Anaemia – 11,173 (Mipa – 3,388 leh Hmeichhia – 7,790)

6. Pregnant Women – 7,820

7. Nikshay Mitra Register hi mi 5,354 (Mipa – 2,522 leh Hmeichhia – 2,832) an awm.

He campaign chhung hian PMJAY/Vay Vandan Cards (Health Card) mi 1645 hnenah pek chhuah a ni a, Blood Donation Camp hmun hrang hrangah neih niin Thisen Unit 1753 pek a ni a. Campaign-ah hian Government Institution te pawhin Health Camp hmun hrang hrangah an huaihawt bawk.