THUAWIHNA CHUAN PATHIAN ROPUI ZIA LO LANNA TURIN KAWNGKA A HAWNG ṬHIN.

#ZONEWS #FIANRIAL SEPTEMBER 03, 2025:
THUAWIHNA CHUAN PATHIAN ROPUI ZIA LO LANNA TURIN KAWNGKA A HAWNG ṬHIN.

Vawiina kan fianrial hunah chuan Baptistu Johana’n Isua a baptis chungchang leh thlalera thlema A awm thu kha ngaihtuah ila. Pathian chuan Isua chu Pathian fapa a nih thu a rawn puang a, ni sawmli chhung chaw a nghei zui hnuah, Isua khan Setana thlemnate kha do hnehin, A rinawmna leh A chakna chu a takin a lantir a ni.

BAPTISMA CHAN LEH THLEMNA

Tin, ngai teh, van atangin awin, “Hei hi ka Fapa duh tak, ka lawm em ema chu a ni,” a ti a (Matthaia 3:17).

I hmalam hun siamtutur hun pawimawh tak i hmachhawn ve tawh thin em?

Baptistu Johana’n a baptis lai khan chutiang hun pawimawh tak mai chu Isuan a tawk a ni. Jordan luiah Isua kha hnimpil a ni a, a rawn din chhuah leh chiah khan vante chu a lo in hawng a, Pathian aw chuan, “Hei hi ka Fapa duh tak, ka lawm em ema chu a ni,” tiin a rawn puang a. Isuan vantlang zinga a rawngbawl tanna turin chunglamin a rawn chhinchhiahna, Pathianin chhandamna hna a thawhna tura Isua tihtur pawimawh tak mai a rawn puanchhuah tanna a ni.

Kan nuna Pathian kohna kan dawnte engtin nge kan chhan let ve ang le?

Baptistu Johana khan a tirah hreh deuh mahsela Isua’n baptis tura a ngenna awihin Isua chu a baptis ta a. A thuawihna chuan Pathian ropuina chu nasa takin a rawn lantir ta a ni. Chutiang chiah chuan keini pawh rinna leh thuawihnaa kan pen chhuah chuan, keimahni kaltlanga Pathian ropuina hnathawh lo lanna tur kawngka kan hawng ṭhin a lo ni.

Eng thlemnaten nge i rinna chu rawn fiah thin a, engtin nge chungte chu i lo hneha i lo sutkian thin le?

Baptisma a chan zawh veleh chuan, Isua chu thlarauvin thlalerah a hruai a, chutah chuan ni sawmli chhung chaw ngheiin, Setana thlemna nasa tak a tawk zui a ni. Thlemna tin mai chu Pathianin A tana a ruatte, Pathianin A venhimnate leh A ruahmannateah a in nghat ngam tak tak em tih fiahna a ni a. Isua kha Pathian thuah innghatin a ding nghet tlat a, Setana rawtna zawng zawngte chu Pathian thu hmangin a lo hnial fithla vek a ni, hei hian Pathiana rinna nghet awmzia chiang takin min entir a ni.

Thlemna do thei turin engtin nge kan intihchak zual ve theih ang?

Isuan Setana a chhannate kha Pathian thua innghat vek a ni a, hei hian Pathian thu hriat leh Pathian thua inchiaha, ngaihtuah thin a pawimawhzia a tarlang chiang hle. Fiahna kan tawh niah, khawvel thila a chinfelna zawng mai lovin, a awlsam zawng ringawt zawng lovin, Pathian thutiam A thute atangin keini pawhin chakna kan la ve thei reng a ni.

NGUN TAKIN INNGAIHTUAH ILA

Kan nuna Pathian kohna kan dawn leh, a hnua fiahna leh chona hrang hrangin a zui tak thin dante ngaihtuah ila. Pathianin kan tana a ruahmanna leh venhimna kan rin leh zual ngaihna hun leh hmunte a awm em le?

Ṭawngṭaia, chaw nghei leh Pathian thu zirin kan thlarau nun tihchakna tur kawng chu ngaihven tlat ila. Pathian thutak hmanga Isua thlemna laka nghet taka dinga entirna a lo siam tawh chu i zui ve ngei ang u.

ṬAWNGṬAINA

Tin, “Nang ka Fapa duh tak i ni a, i chungah ka lawm em em a ni,” tiin van atangin aw a lo chhuak a (Marka 1:11).

Ka Pa vana mi, I faah min pawm avangin lawmthu ka hrilh a che. Ka nihna chiang tak avang hian, thlemna hmun thlaler ka kal tlang lai pawhin, Nang chu ka hnenah I awm a, Setana dawt tinreng hneh thei turin nang chuan I thute hmangin min thuam chak thin. Inpekna aia nawmsakna hmanga thlem ka nih hunin, I thu hmanga Setana chu hnawhbo zel ka duh e. Nangmaha ka nihna ka chian lohna turin Setana chuan he khawvel nawmsakna leh hmingthanna, duhamna te hmangin min rawn thlem thin mahsela, ka duhthusam chu nangmah atang chauhin ka hmu thei a nih tih hi lo hriattir zel ka duh e. I thu kal tlanga nghet taka min dintir avangin Lalpa ka lawm e. Ka nunah hian Setana’n thuneihna  a nei tawh lova, Lal Isua nunna leh thihna hmangin hnehna pumhlum chu ka ta a ni si a. Isua hmingin ka dil e, Amen!