VAIVAKAWN VENBUK RAM LAND LEASE HLANNA HUN HMAN A NI

#ZONEWS Aizawl August 20, 2025: Vawiin August ni 20, 2025 (Nilaini) hian LR&S Minister Pu B. Lalchhanzova office chamber-ah Venbuk ram, Vaivakawn land lease inhlanna hun hman a ni a; he hun hi bialtu MLA & Minister Pu Lalnghinglova Hmar-in a kaihruai a ni.

Pu B. Lalchhanzova chuan, “Revenue Dept hi kan insiamtha chho zel a, department chhungah monitoring mechanism kan duang a, kan land revenue rule amendment-te pawh Assembly-a pharh turin kan inbuatsaih mek a ni. Vaivakawn Venbuk ram khu kum engngemawzat lo buaipui tawh a ni a, ram buai chinfel hi a hautak hle mai a, department leh mipuite kan tan rual chuan heng harsatnate hi awlsam zawkin a chinfel theih a ni tih vawiina land lease kan inhlan hian a tichiang hle a ni. Bialtu MLA & Minister Pu Lalnghinglova Hmar-in theihtawp a chhuah a, tunah chuan Vaivakawn khawtlang kutah Venbuk ram a lo awm thei ta a, ka lawmpuiin khawtlang tan tangkai taka hman a nih ngei ka beisei a ni,” a ti.

Pu Lalnghinglova Hmar chuan, “Vawiin hian Vaivakawn khawtlang tana mellung pawimawh tak tih theih tur lung kan phum thei a, khawtlang hruaitute thawhrimna zarah a hlawhtlinna hmel kan hmu chho thei hi ka lawm hle a ni. Tuna ram kan tihfel tak hi khawtlang tan rotling leh tangkai taka hman a nih theih nan; khawtlang hruaitute leh kan hotuten ngaihtuahna an seng chhunzawm zel dawn a, Aizawl luhna leh kawtchhuah lun lai a nih avangin thianghlim leh felfai taka enkawl pawh a ngai dawn a ni,” a ti a.

Land Lease inhlannaah hian Pu R. Zothanmawia, Vaivakawn Local Council Chairman kal chhuak chuan report pein; Pu Lalchawimawia, Vaivakawn Local Council Chairman ni mek chuan thu a sawi bawk.