ZONEWS FIANRIAL: “CHAPONAIN A TIHCHHIAT MAI TUR LAKAH INNGAIHTLAWMNA CHUAN A VENGHIM THUNG ṬHIN A NI.”

#ZONEWS #FIANRIAL July 23, 2025:
Vawiinah chuan Lal Uzia leh Juda te chunga a rorelna chungchang ngaihtuah ila. Pathian kaihhruaina hnuaiah rinawm takin bul a ṭan chungin, a chapona chuan tlukchhiatnaah a hruai lut ta thung a ni. A chanchin hian chapo taka invaivung hlauhawmzia min zirtir a ni. A fapa Jothama chuan Pathian leh Israel-te inkar chu rawn siamtha lehin, rinawm tak leh inngaitlawm taka awm reng pawimawhzia a rawn lantir a ni.

LAL ROPUI TLUKCHHIATNA
II Chronicles 26:16
Nimahsela a lo chak tak hnu chuan a rilru a lo sâng ta a, tha lo takin thil a ti a, LALPA a Pathian chungah thil a tisual ta a; mâicham rimtui hal tûrin LALPA biak inah a lût ta maia.

Tum ṭha tak leh ropui tak nen bul i ṭan ve a, mahse a laklawhah i chapona emaw i indahsanna avang emawin i tawpsan ve tawh em?

Lal Uzia chanchin hian hlawhtlinnain awlsamtea min hruai bo theih zia min hriat nawn tir a ni. Kum 16 a nihin Uzia chu Judate Lal a ni a, Lal a nih veleh Solomona ang bawkin Pathian hnen atanga finna chu a zawng nghal a. Pathian kaihhruainaa a innghah avangin hmuingilna leh Judate hmelma laka himna chu a thlen a, an chhehvela hnamte pawhin an zahin an ngaihsan phah a ni.

Engvanga hlawhtlinna hian chaponaa min hruailut fo ṭhin nge ni ang le?

Uzia chanchin hian a tira rinawm ber ber te pawh hi an chaponain a tichhe fo thei ṭhin a ni tih a lantir a ni. Uzia hmingthanna chu a lo darh zau zel a, a chapona pawh a lo sang zel bawk a. Puithiamte chauhin an tihtura ruat, rimtui hal turin biak inah chuan a lut ve ngawt mai a. He a bawhchhiatna hian a tlukchhiatnaah a hruai lut a, Pathian chuan phar natna a vei tir a, a thih hma zawng chu midang bula awm thei lovin, a hranga a chen a lo ngai ta a ni.

Eng kawngah te nge chapona emaw mahni thei intih tawk vena i hma chhawn ve ṭhin le, a bikin hlawh tlinna i chan hnuah mahni induh tawk leh intivei takin i awm ve thin em?

Uzia tlukchhiatna hian inngaihtlawmna leh Pathian thu anga awm reng pawimawhzia min zirtir a ni. Enga mi hlawhtling leh thiltithei pawh ni ila, kan chakna leh finna hi Pathian hnen atanga lo kal a ni tih kan hre reng tur a ni tih hi he Uzia chanchin hmang hian min hrilh satliah mai ni lovin, min vaukhan lawk a ni.

Uzia chu tluchhiain hlawhchham mahsela, amah thlaktu a fapa Jothama erawh chuan Pathian nena an hnam inlaichinna chu a rawn siam ṭha leh a. Jothama chuan thuawihna leh inngaihtlawmna nen ro a rawn rel ta a. Hruaitu leh roreltu nihna dik tak chu Pathian laka rinawm taka awm rengnaah a innghat a ni tih a rawn tilang chiang hle a ni.

NGUN TAKIN INNGAIHTUAH ILA!
Kan hlawhtlinna chan ve te kha ngun takin I ngaihtuah teh ang; chaponain zung a lo kaih ve reng tawh lo maw? Ka hlawhtlinna chu Pathian vang a ni ka ti ṭhin nge, ka chapona leh intihveina chuan Pathian hruaina chu a hliahkhuh ṭhin zawk le?

Chapona chu a hun taka kan hriatchhuah a, kan hneh theih nan Pathian hnenah inngaihtlawmna thinlung dil thin ang aw. Pathiana innghah tlatna leh inngaihtlawmna atangin ropuina tak tak chu a lo kal thin a ni tih i hre reng ang u.

ṬAWNGṬAINA
Tin, lal Uzia chu an khap a, a hnênah, “Uzi, LALPA tana rimtui hal hi i tih tûr a ni lo va, rimtui hal tûra tihhran Arona fapa puithiamte tih tûr a ni zâwk e; hmun thianghlim ata hi chuak rawh; thil i tisual a nih hi, LALPA Pathian laka i ropuina tûr pawh a ni bawk lo,” an ti a – II Chronicles 26:18

Aw Lalpa, mahni ka inngaihhlut lutuka, chaponaa ka luh lohnan ka thinlung min ven sak ang che. Ka tum tihlawhtling thei turin chapona lakah min veng ang che. Nangmahah chauh chuan nghet taka ka thinlung hi dah ka duh a. Nangma kawngah ka kal a, Nangmah ka zah che a, ka chawimawinaah che chauh hian zahawmna leh chawimawina tak tak chu a awm si a. Midangte aia tha zawk leh ropui zawka inngaihna nei a, Lal Uzia kawnga ka kal lohnan min hum tlat ang che. Ka thiltih leh tumte chu I duh zawng ang ni zel rawh se. Ka thinlung chu fim taka a awm a, ka mit chu fiah taka a men a, chapona kawnga min hruai thei ten min hual vel karah pawh tlukchhiatna kawng chu lohnan, Isua hmingin ka dil e, Amen!