#ZONEWS: Land Revenue Minister-in Saitualah Revenue Branch a hawng

#ZONEWS July 8, 2025: Vawiin khan DC Conference Hall, Saitualah Revenue Branch hawnna hun hman a ni a, Pu B. Lalchhanzova, Minister of State, Land Revenue & Settlement Department chu khuallian niin a hawng nghal a ni.

He hunah hian khuallian Minister Pu B. Lalchhanzova chuan thu a sawi a, Saitual District-a Revenue Branch hawn a ni chu lawmawm a tih thu sawiin, Saitual mipuite pawhin tangkai taka an chhawr ngei a beisei thu a sawi bawk. Revenue department chuan hna insemzai “decentralization” kalpui chu a tum ber a ni tih sawiin, thingtlang atang pawha Aizawl pan kher ngai loin an awmna district-ah Revenue office an dawr thei dawn a, hei hian mipuiteah awlsamna a thlen dawn a ni, a ti.

Minister chuan Land Revenue & Settlement Department chu department dawr harsa tia sawi thin a ni chu pawi a tih thu a sawi a, hei hi thlak tumin “Customer care policy” te duanga theih tawp chhuah zel an tum a ni, a ti. Land Revenue lama hotute chu an thawk rim hle tih Minister chuan a sawi a, chutih rualin ram lei leh hralh kawnga mipuite fimkhur tawk loh vangin buaina a tam thin a, hei vang hian mipuite pawh ram lei kawngah fimkhur turin chah a ni.

Pu B. Lalchanzova chuan inrelbawlna felfai tak hnuaiah Revenue department chu a kal chho zel tih a sawi a, district tin thuam chak an tum thu sawiin, hma bak la ko viau mah se theih tawp an chhuah zel dawn a ni, a ti. Minister chuan department hrang hrang te chu thawhhona (convergence) tel lo chuan hmasawnna a thleng thei lo tih sawiin, department hotute pawh thawhhopuiah a sawm a, Revenue branch chu tangkai taka hmang turin Saitual District mipuite chu a duhsakna a hlan nghal bawk a ni.

Saitual District-a Revenue Branch-ah hian Settlement Officer, Surveyor – I, II, III leh thawktu dang 7 an awm a. Saitual District-ah hengte hi pek chhuah (issued) tawh an ni: LSC – 3411, House Pass – 1247, P. Patta – 3661, Land Lease – 19, WRC LSC – 39, G.LSC – 62, a vaiin – 8439 pass a ni tawh a, la tih fel chiah loh 825 a awm bawk. Application pending mek hi 443 awmin, LSC approve tawh issue tur hi 382 a awm a ni.

Revenue Office hi Saitual DC Office-ah dawr theihin an awm ang. Hengte hi an thawh theih turte chu a ni:

1. Record keeping
2. Issue of pass- i) LSC ii) P. Patta iii) House Pass iv) Shop/ Stall Pass v) Agriculture/ Garden LSC vi) MISC Pass
3. Mutation
4. Re-issue
5. Mortgaged
6. LVC, NEC, NOC issue
7. LVC, NEC, NOC update
8. Renewal of P.Patta and House Pass
9. LSC Clearance certficate issue
10. Document update (cancellation, area grade correction)
11. Scanning of Land Record (New and update)

Vawiin Revenue Branch hawnna inkhawm hi Saitual Bawrhsap Dr. Lalngura Tlauin a kai hruai a, Khuallian Minister Pu B. Lalchhanzova leh Pu Vanlalmawia, Secretary, LR&S Dept chuan thu sawiin technical report hi Pu R. Lalthazuala, Director, LR&S Dept hnen atangin ngaihthlak a ni. District thar pathuma Revenue Office kalpui a nih dan chu Saitual DC Dr. Lalngura Tlau, Khawzawl DC Pu K. Vanlalthiana leh Hnahthial DC Pi K. Vanlalruati ten an sawi zau a. Pu Lalthakima Chhangte, Settlement Officer & SDO (S) chuan lawmthu sawinain hun a khar a ni.

#zonews #chanchinthar #tualchhung