#ZONEWS: Mahatma Gandhi National Rural Employment Guarantee Scheme (MGNREGS) hnuaiah tun sorkar kum tharah hna 5,758 thawh tana ni tawh

#ZONEWS July 8, 2025: Mahatma Gandhi National Rural Employment Guarantee Scheme (MGNREGS) hnuaiah tun sorkar kum tharah hna 5,758 thawh tana ni tawh.

Vawiina Rural Development & Administration Minister hoa State Employment Guarantee Council (SEGC) thutkhawm he thu hi tarlan a ni a. Thutkhawm kaihruaitu Rural Development Minister Prof. Lalnilawma chuan mipuite’n an chhawr tangkai ngei tur hna uluk zawka thlanchhuah leh thawh kawngah State level leh District level-a Convergence Committee-te’n thawhhona tha an neih a pawimawh zia a sawi a. Tunhnaia tlawh hlawh em em ‘Ngai tlang’ lawnna step chu MGNREGS hnuaia “Project Rotling” 15 thlan chhuah zingah telin, hemi project atang hian step chu siam a nih thu a sawi a. Minister chuan MGNREGS thawktute hmalakna leh Social Audit Unit-in Financial Year 2024-25 chhunga Mizoram chhunga khua 874-a hnathawhte an endik kim vek thei chu fakawm a tih thu a sawi bawk a ni.

Vawiin MGNREGS chungchang thlirhona meetingah hian sorkar kum kalmek 2025-26 atan hna 5,758 thawh tan tawh niin, chung zinga hna 3,326 chu thawh zawh tawh a nih thu tarlan a nia a. Job Card 2,13,197 pek chhuah tawh zingah Job Card nung 2,12,676 awmin, heng zingah hian hna thawk thei 2,13,444 an awm tih tarlan a ni bawk. Tunah hian Mission Amrit Sarovar Phase II kalpui mek niin, hmun 131 ah dil thar siam leh a awm sa siam that nan hmalak mek a ni a. Social Audit Report atangin MGNREGS hna thawh kawnga harsatna hrang hrang tawhte chinfel an nih thu tarlan a ni bawk.

#zonews #chanchinthar #tualchhung