#ZONEWS: NATIONAL HIGHWAY VAIRENGTE TO SAIRANG CHUNGCHANGA MIZORAM PWD THUCHHUAH

#ZONEWS July 10, 2025: Public Works Department, Government of Mizoram chuan vawiin khan a hnuaia tarlan ang hian National Highway Vairengte to Sairang chungchangah thuchhuah an siam.

NHIDCL, Executive Director, Mr. Virender Jakhar chuan NGO pali te hnenah ni 03.07.2025 a Bilkhawthlir – Kolasib leh Kawnpui – Khamrang kawng chungchang thu a hrilh chu thudik tawklo leh felhlel deuh awm nia hriat avangin PWD chuan thuchiang zawk ahnuai ami ang hi tarlang tha a ti a ni.

Vairengte – Sairang inkar kawng hi Ministry of Road Transport and Highways (MoRTH) Gazette 2209(E) dated 03.07.2020- a chhuah angin NHIDCL enkawl tura tih a ni a. Bilkhawthlir – Kolasib leh Kawnpui – Khamrang kawng bik hi kum 2019 a resurfacing sanction hmuh a nih laiin a kawng siam hna hi thawh zawh a la nih loh vangin PWD chuan NHIDCL ah a transfer nghal lova, hna thawh zawh a nih hian PWD chuan resurfacing tihna tur sum hi NHIDCL hnenah hlan tumin vawi tam tak hriattirna a thawn a, meeting te neihpui an ni, hetih lai hian NHIDCL chuan Defect Liability Period (DLP) zawh hma chuan an la zui duh ta lova. DLP zawh hnu leh contract pakhat zawk terminate a nih hnuah PWD chuan NHIDCL ah transfer an tum leh a, mahse, an la duh ta chuang lo a ni. A kawng hi NHIDCL lak tur a Gazette a chhuah tawh a nih avangin, PWD hian a siamthatna tur estimate te siam thin mahse, MoRTH lam hian an sanction thei Io a, Mizoram Sawrkar chuan Zoram tan a kawng pawimawh a ni tih hriain State pawisa hmangin theih ang angin a enkawl zui ta a ni.

Chief Minister Pu Lalduhoma hova meeting ni 18.10.2024- a neih ah inhlan hun tur thu tihtluk a ni ta a. Thla hnih leh a chanve hnu January 2025 ah inhlanchhawng tura inrem a ni. He inremna ang hian EE, NH Division-Ill chuan 03.01.2025 khan inhlanna document chu NHIDCL GM, Kolasib kutah a thawnlut ta a. Helai inkar kawng hi NHIDCL ten an la tender mek avang leh kawng a that loh avangin State Sorkar chuan 2024-25 financial year chhungin cheng nuai 200 a sanction a; 2025-26 chhungin cheng nuai 111 chuang, kawngchhia thawmthat nan a sanction leh bawk a ni.

National Highway hi MoRTH ta liau liau a ni a, construction leh maintenance fund pawh an tum vek nih avangin, Chief Minister Pu Lalduhoma chuan ni 28.05.2025 khan Union Minister Nitin Gadkari hnenah helai kawng hi tha taka siamsak turin a thlen a, he meetingah ah hian NHIDCL Director (Technical) chuan Union Minister leh Chief Minister hnenah helai kawng inkar hi PWD atangin NHIDCL ah transfer a nih tawh thu a Io hrilh a. Union Minister hian NHIDCL Director (Technical) chu Bilkhawthlir – Kolasib leh Kawnpui – Khamrang kawng a hmun tlawh a, motor tana tlan awlsam tura siam nghal turin a ti nghal nghe nghe bawk a ni.

He kawng chungchangah hian Chief Secretary, Govt, of Mizoram in NHIDCL hotute ni 04.07.2025 dar 3:00 PM a a koh tumin an kawng enkawl lai a nih tawh thu leh Bilkhawthlir – Kolasib leh Kawnpui – Khamrang kawng enkawlna tur atan contract agreement an sign pui tawh thu NHIDCL lam chuan an thlen a, a hna pawh Contractor in an tan nghal thuai tur thu an sawi nghal bawk. Heng hi tuna Bilkhawthlir – Kolasib leh Kawnpui – Khamrang inkara NHIDCL in Mizoram Sorkar hotu lu ber Chief Secretary hnena an report dan a nih avangin an Executive Director in PWD enkawl lai ni anga NGO pali te hnena a sawi chu thudik tawk lo leh felhlel deuh a nih thu mipui hriatah Mizoram PWD chuan a tarlang a ni.

#zonews #chanchinthar #tualchhung #sawrkar