#ZONEWS: Vawiin July 7 ni hi MNF Founder President Pu Laldenga thih champha vawi 35 na a ni.

#ZONEWS July 7, 2025: Vawiin hi MNF Founder President Pu Laldenga thih champha vawi 35 na a ni a. MNF party chuan tukin dar 7 khan Aizawl Treasury Square a Pu Laldenga thlanah amah sunna leh zahna lantirin hun an hmang.

He hunah hian MNF President Pu Zoramthanga chuan thusawiin Pu Laldenga chu Mizote lungphum pawimawh ber te zinga mi ani a ti a, India ram mai ni lo khawvela Mizo hnamte pholangtu ani tiin thangthar zelte thinlungah Hnam thinlung (Nationalism) a tuh a ti a. Sawisela ngaihnep tum awm thin mahse thalaite finna a sang tulh tulh a, Pu Denga hlutna an hrechiang chho zel tih sawiin Mizo hnam leh Mizoram a awm chhung chu Pu Laldenga hming a daih tawh loh tur thu a sawi a ni.

Pu Laldenga fanu Dr. Renee Lalrinzuali, pawhin chhungkaw aiawha thusawiin, a pa hriatreng nana hun hmangtu zawng zawng chungah lawmthu a sawi a. A pa chuan chhungkua aiin Mizoram leh hnam a dah hmasa zawk ṭhin tih sawiin harsatna tam tak an paltlang a ti a, Mizoram a hmangaihnaah a tum a thlen dawn chuan a theihtawp a chhuah thin tih a sawi bawk.

Pu Laldenga hi kum 1927 July 11 khan Lunglei Pukpui khuaah a lo piang a, kum 1944-ah British Indian Army zawmin Kum 1959-ah Mizo National Famine Front chu a hova din niin, chu pawl chu October 22, 1961-ah Mizo National Front (MNF) tiin thlak a ni.

Kum 1966 March ni 1 ah zalenna sual tanin, Thalai rual tam tak te nen kum 20 chhung zalenna an sual hnuin mizo mipui, kohhran leh tlawngai pawl, zirlai pawl leh political party hrang hrangte ngenna avangin, June 30, 1986 ah India sorkar nen Remna Thuthlung an ziak fel a, state puitling nih hnua Mizoram Chief Minister hmasa ber a ni.

Kum 1990 khan Memorial Sloan Keterring Cancer Centre New York, USA ah thla 3 a awm hnuah kum 1990 July ni 7 a thi a, Aizawla lak niin July ni 13 ah State Funeral pein sawrkar chawimawina famkim nen vuiliam a ni.

#zonews #chanchinthar #tualchhung #laldenga #mnf