#ZONEWS: CNDF leh CDF-Hualngoram buai ching fel turin Chinland Council (CC) leh Chin Brotherhood (CB)-ten ngen

#ZONEWS July 7, 2025: Falam township base, CNO/CNDF leh CDF-Hualngoram buaina chu ralthuam nena ching fel lovin sawi hona hmanga remna zawng turin Chinland Council (CC) leh Chin Brotherhood (CB)-ten an ngen thu an tar lang a ni.

Chin State-a Military council-ten beih rawn tur a nih laia pawl 2-te buaina hi indona hmanga ching fel lovin hmaichhana sawi hona hmanga ching fel turin Chinland Council chuan July ni 3 khan an tar lang a ni.

Ramri chungchang chu revolution hnuah sawi fel a that thu Chinland Council chuan a sawi.

Hnam sipai hruaitute hian Chin unaute inkarah buaina chawk chhuak lovin mahni awmna bial hre chianga inbeihna tih tawp thuai turin lej mahni rorelna huam chunga camp-ah awmhmun khuar leh turin Chinland Council chuan a ngen a ni.

Tuna CNO/CNDF leh HPO/CDF-Hualngoram huam chhunga inbeihna hian Chin mite tun dinna leh Chinland siam thatna atan thanmawhbawk a ni thei a, hmlak tum mek Chin National Council kawngah rokhawlhna pakhat a nih thu, Chinland Council chuan a tar lang a ni.

Chin Brotherhood pawhin Falam township chhunga tuna buaina chungchangah inrawlh a tum lova, tuna pawl 2-te hi Military council-te um chhuak duhna rilru puin Chin revolution pawl an nih angin sawi hoa remna siam turin July ni 3 khan thuchhuah a siam a ni.

Chin hnam sipai pawl 2-te inkara buainaah sawi hona hmanga ching fel turin Chin Brotherhood chuan mawhphurhna an neih len thu a sawi a ni.

CNO/CNDF leh HPO/CDF-Hualngoram inkar buainaah pawn lam revolution, eng ralthuam keng pawh inrawlh lo turin Chin Brotherhood chuan a hriattir a ni.

Pawn lam revolution, ralthuam keng pawlte an inrawlh chuan, buaina punlun theiin thisen chhuah theihna hial dinhmun a ni thei tiin Chinland Brotherhood chuan a sawi a ni.

Ralthuam keng pawlten inremna siam tur ni lova, indona pui tura inrawlh an awm chuan Chin Brotherhood leh CNO/CNDF-te nen nghet takin an din tlat dawn thu, Chin Brotherhood chuan a tar lang a ni.

CNO/CNDF leh HPO/CDF-Hualngoram te chu July ni 2 khan an inkap a, HPO/CDF-Hualngoram sipai thenkhatte chu, CNO/CNDF-ten an man thu hriat a ni.

CNO/CNDF-te hi Chin hnam sipai pawl 6 infin khawm ICNCC niin Chin Brotherhood member an ni a, HPO/CDF-Hualngoram pawl te erawh Chin hnam sipai pawl 19 infin khawm Chinland Council, Chinland sorkar member-te an ni.

#zonews #chanchinthar #zofate