Central chuan State-te chu Lei tihthatna (Fertilizer) lem leh tha lo lakah khauh taka hma la turin a hriattir.

#ZONEWS July 14, 2025: Central chuan State-te leh UT-te chu Fertilizer lem leh tha lo lakah khauh taka hma la nghal turin a hriat a. Union Agriculture and Farmer’s Welfare Minister Pu Shivraj Singh Chouhan chuan State leh UT zawng zawng Chief Minister-te hnenah hemi chungchang hi lehkha a thawn a ni. He lehkhathawnah hian Fertilizer lem hralh chhuah man vek turte, Sawrkarin a man hniam zawka Fertilizer a pek chhuah thin, phalna lova lo hralh thin man turte leh, Ram chhung hmun hrang hranga phalna lova Fertilizer lo siam leh hralhte chu man chhuak vek turin a hrilh a ni. Pu Chouhan chuan, “Agriculture hi India economy ruhrel siamtu a ni a, Loneitute sum hailuhna mumal leh nghet tak siamsak hi kan tihtur a ni bawk a, chuvangin Fertilizer tha a hun taka a man pawh an lei theihna tawk tura pek chhuah hi kan tih ngei ngei tur a ni,” tiin a sawi a ni.

Minister chuan, “State-te mawhphurhna chu Fertilizer mamawhna hmun dik taka, mamawh tawk atam thlen tir zel hi a ni,” a ti a. State zawng zawngte chu thil tisualtute laka khauh taka dan lek kawh tur leh, a tul anga FIR-te theh luta, an phalna (license) te pawh tihtawp sak turin a hrilh a ni. Minister chuan state zawng zawngte chu rang taka state pumpuia fertilizer lem leh chumi kaihhnawih harsatnate chu a zunga zawng chhuak a, hma la turin a phut a. Chu chuan Loneitute nasa takin a pui dawn a, state chhunga Loneitute pawhin awmze nei leh hlawk zawkin mumal takin hna an thawk reng thei dawn a ni a ti.

#zonews #chanchinthar #ramchhung #sawrkar