SCHOOL EDUCATION MINISTER-IN MBSE BUILDING THAR A HAWNG, MIZO TAWNGA PAWL 12 ZIRLAIBU BUATSAIH A TLANGZARH BAWK

#ZONEWS July 17, 2025: Vawiin khan Dr. Vanlalthlana, Minister, School Education Department chuan Mizoram Board of School Education Building thar hawnna hun hmanpuiin, Pawl 12 zirlaibu Physics, Chemistry, Biology leh Mathematics, mizo tawnga buatsaih chu a tlangzarh nghal bawk.

Education Minister Dr. Vanlalthlana chuan Mizoram Board of School Education building thar luah theih a sak zawh a ni chu lawmawm a tih thu sawiin he building sak puitlin nana MBSE-a thawktute thahnemngaihna te, PWD Project Division-a thawktute leh a hna thawktu Contractor-te hmalakna chu lawmawm a tih thu a sawi a. New Education Policy 2020-in a beisei anga zirlaibu engemaw zah mizo tawng a buatsaih a nih tawh bakah vawiina Pawl 12 Science leh Mathematics zirlaibu hman tur, mizo tawnga buatsaih, tlangzarh lehna chuan Mizoram chhunga zirnain hmasawnna a hmuh phah ngei a beisei thu a sawi.

Education Minister chuan NCERT hnuaia zirna dinhmun endikna pakhat, Performance Assessment, Review and Analysis of Knowledge for Holistic Development (PARAKH) hmanga Mizoram school engemaw zah endiknaah dinhmun duhawm loh taka ding anga kan lan mek laiin, zirna in sang zawk, College leh University-te erawh National Assessment and Accreditation Council (NAAC) endikna ah hmahruaitu zingah an tel zel thung, tih a sawi a. He inthlauhna hi zirchianga, ruahmanna siam a nih theihna turin NITI Aayog-ah thlen a nih thu a sawi bawk a ni.

Dr. Vanlalthlana chuan School Education Department hnuaia thawktute intuaihriam zel nan Training pawimawh tak tak buatsaih thin a nih thu tarlangin heng training-te hi a chhawr tangkai tur tak te hnen a thlen theih nan Training-a tel ngaih pawimawh a tul thu a sawi a. Zirlai syllabus tha tak tak duan ni mahse, zirtirtute zawhna siam (question set) danin a zir loh chuan zirlai naupang ten thiamna tluantling an neih loh theih thu a sawi a. Hemi kawngah hian School Education Department-a thawktute chu tan la zel turin a fuih.

Education Minister chuan Sap tawng leh tawng dang hrang hrang thiam a pawimawh rualin mahni pianpui tawng hlamchhiah phah nana hman erawh chu hnam anga boralna thlentu a nih theih thu a sawi a. Mizo tawng ngei a zirlai lehkhabu buatsaihna chuan zirna kawnga hmasawnna thlentu a nih a beisei bakah hnam humhalhna kawnga hmanraw pawimawh tak a nih a beisei thu a sawi bawk a ni.

Pu T.Lalhlimpuia, MLA pawhin he hunah hian thusawiin, khawtlangah ngaihsan tur dik leh ngaih pawimawh tur dik kan thlan thiam a pawimawh thu a tarlang a. Zirlaite chuan zirna chu an thupui ber tur a nih thu leh hlawhtlinna chang tur chuan an zirna tibahlah theih thil danga inhman tam loh a pawimawh thu a sawi a. Zirna leh thiamna chu ram leh hnam humhalhna hmanraw pawimawh tak a nih thu a tarlang bawk a ni.

Pu David Lalthantluanga, Special Secretary, School Education Department chuan Mizoram chhunga School-te chu National Education Policy 2020 in a phut angin State School Standard Assessment (SSSA) hmanga endikna kalpui thin a nih tur thu a sawi a. Ram pum huap, zirna a inelna hrang hrang, National Eligibility cum Entrance Test leh Joint Entrance Examination-a mizo zirlaite dinhmun en hian kan zirna kalpui dan hi thlirlet a, tan lak ngaihna lai zirchian a, hmasawn tura kan inbuatsaih zel a pawimawh thu a sawi.

MBSE Building thar hawnna leh Pawl 12 Science zirlaibu mizo tawnga buatsaih tlangzarhna hun hi Pu JH Zoremthanga, Chairman, MBSE chuan a kaihruai a. Pi Sarah Lalengzami Pachuau, Secretary, MBSE chuan MBSE hnuaia hmalakna hrang hrang tarlanna hun a hmang a. Er. Lalremruata, Sr. EE, Project Division III, MPWD leh Pu R.Lalthlamuana, Deputy Secretary, MBSE-te chuan report pein Pu Lalrinmawia Ralte, Controller of Examination, MBSE chuan lawmthu sawina hun a hmang a ni.

Vawiin Technical Report-a tarlan danin MBSE Building thar hi NEDP Scheme hnuai a Cheng nuai 1,000 hmang a sak a ni a. Ni 18, February 2021 khan building sak hna hi tan niin ni 14, December 2024 khan peih fel a ni a. Ni 22, April 2025 khan MBSE kutah hlan fel a ni. Building hi chhawng 7-a sang a ni a, thawktute thutna tur room hrang hrang a awm bak ah Record Room, Library cum Research Room, Tabulation & Evaluation Hall, Strong Room, Store Room Conference Hall leh mi 30 chuan theihna Elevator-a awm bawk a ni.

MBSE hmalaknain Pawl 10 Maths leh Science subject lehkhabute kha tihchhuah hmasak ber an ni a, kum 2022 kum tawp lamah (Nov. 30th 2022) khan chhuah a lo ni tawh a. Pawl 9 Maths & Science lehkhabu kha 2023 kumtir (Feb 6th 2023) khan tihchhuah a ni a. Pawl 9 leh 10 lehkhabute hi MBSE in copyright a neih textbook an nih avangin translation type-a buatsaih a ni a. Pawl 11 leh 12 erawh chu copyright te a awm theih avangin translation ni tawh lovin, textbook writers-ten reference material eng emaw zat nen tangkawpa anmahni irawma an buatsaih a ni thung. Pawl 11 Physics, Chemistry, Biology leh Mathematics textbook-te chu June 28th 2024 khan tlangzarh an lo ni tawh bawk. Pawl 12 lehkhabute hi vaiin copy 700 theuh chhuttir a ni. Physics lehkhabu hi phek 493 niin Rs. 300 man a ni a, Chemistry hi phek 550 niin Rs. 350 man a ni a. Biology hi phek 331 a chhah niin Rs. 250 man a ni a, Mathematics hi phek 329 niin Rs. 250 man a ni.