TAHAN LITERARY CIRCLE ( TLC) TEN THU LEH HLA LAMA MIBIK-TE SUNNA HUN AN HMANG.

Tahan Literary Circle chuan Mizo thu leh hla lama mibik mualliam ta te hriatrengna hun chu July 19, 2025 chawhnu ( dar 1) hian khan an hmang a. Heng a hnuaia mite hriatrengna hun hi an hmang a ni.

( I ) Lehkhabu tihchhuah ( Book Publishing ) khawngah

1. Pu M . C Lalrinthanga

(II) Thu lamah

1. Rev. Z T Sangkhuma

2. Prof. Dr Darchhawna

3. Pu Thangfala Sailo

(III) Hla lamah

1. Pu K.Darchhawna

2. Pu Elis Saidenga

3 . Pu Biaksanga -te an ni.

Tahan Literary Circle member-te hi ka mi ngainat tak tak an ni hlawm a, Aizawl atangin Tahan ka zin changin an Headquarters atan an hman ber an Secretary Pu Bawlliana-te inah Kan in hmukhawm thin a, an member thenkhat chu Mandalay University a Post graduate an zirlaia ka lo hriat leh nel em em an ni a, a then phei chu a hunlaia College zirlaite function an neih apiangin stage chunga kekawr tlangarh leh sam buk tak nen lo zai thinte an tel bawk a,tunah chuan mi zahawm tak niin kohhran pakhatah hruaitu ber dinhmun changpha chin leg Theology lama Doctorate Degree hial nei a ni tawh.

A then chu ka pa rual deuh thaw an ni hlawm a, Rawngbawltu leh upa niin an vanglaiin Kohhran leh khawtlangah mi thawhhlawk tak tak an ni a,thenkhat chu ka naupanlaia ka lehkha zirpui ni thin tunhnua Private School ropui tak dina mahni intodelh tak tak an ni hlawm a, keini ho inhmu hi chu khawtlang rorelna leh ram dinhmun sawi aimahin thu leh hla lam hi kan sawi leh thin a ni.

Mizote hian mi ropui tak tak , kan hnam tana mi hlu tak tak, sulhnu hlu tak tak hnutchhiah kan nei nual a. Chung zinga mi tam tak chuan, an chanchin hỉ an thup emaw tih mai turin mipui nawlpui hian hriat kan hlawh lo thin a ni.

Chutiang miropui mualliam tate chu a hrechiangtu TLC te chuan an chawimawi thin a, Hetianga an chanchin sawi chhuak a, a sun nan hun an hmanna chang an hria hi an fak awm hle a ni.

An chawimawi leh an sun zingah chuan ka mihriat chian leh ka nel em em an tel ve nual a, A hmasa berin PROFESSOR DARCHHAWNA chanchin amah sun nan a sulhnu thenkhat i han sawizui teh ang:-

Lungleia khuaa Hydro Electric Investigation Divisiona hna zawm tura ka kal ni chuan office kawngka bulah nu zahawm tak hmel fang tha tak mai nen hian ka inhmu hmasa ber a, appointment hmu tharin , he officeah hna zawm tur ka nih thu ka hrilh mawlh mawlh a, a ni chuan hawihhawm tak in min lo chiauau a, Establishment Section lamah min hruai ta a,Joining report min ziah sak thlap a, a tul tul min buaipui a ni. Chu Hmeichhe zahawm tak chu , Kan office Account Branch lama hotunu ber Divisional Accountant Pi Hmingtei ( Pi Hmingthanzami ) hi a ni a, Lungleia Dhubi Muala an awm thu leh Dhubi Muala chu Lungleia College bul lawkah a awm thu min hrilh a, rawn leng thin turin min sawm a ni.

Lungleia Hydro Electric Office han sawi takah chuan a lunglen thlak em mai a, tlem Kan sawi peng lawk duh a, Establishment Sectionah hian thawktu Mipa ka hmu mang lova ,nula chhelo deuh leh nutling deuh hlir chu an thu a tlar thup a, ka zam ang reng hle a ni.Fiamthu lah chu an duh ang reng hlawm a, an zingah Clerical staff ka la hriat rengte chu tuna Mizoram Cabinet Ministero nita Pi Lalrinpuii pawh a tel a ni. Service Book min siam sak a,ka kut zung tang thla (Finger Print ) an lak zawh hian nui tlut tlut chungin ka mangei pheihkhawk min phelh tir a , ka ruala rawn zawm ve staff Pakhat nen kan kephah thla (Foot Print ) min lak sak bawk a ni. Hna ka join hlima min lo lawmtu Pi Lalzidingi ,Pi Tluangi , Pi Chhani , NL.Biaktei , NL.Saizikpuii te kha ka la hre reng che u a nia .

Thlakhat vel Lungleia ka awm hnu chuan Inrinni tukkhatah ka thawhpui ADA hna chelh mek Tv. Lawmzuala nen Pi Hmingteii inah Kan leng a ,Pi Hmingtei chu Lungleia College Principal Pu Darchhawna nupui a lo ni reng a , amah Prof.Darchhawna pawh chu Pi Hmingtei zarah ka hmelhriat phah ta a, a thuziak hi MEICHHER tih vela ka lo chhiar fo thin Essayist a lo ni reng a.

Thuamtea Khawlhring phei chuan, ‘Mizo Essayist tha ber’ah ka pawm a ni a ti hial a ni. A hriatna a zauin a thuk a. Philosphy tha tak a nei a. A essay te hi a khal tha hle. Beisei ram 1 leh Beisei ram 2-ah khan a essay ho chu a khungkhawm a,lo chhiar ngei ngei ang che u .

Mi chapo lo tak mai leh inti vei lo tak a ni. A kut chhuak leh a sulhnu bihchiang chuan an ngaisang tawlh tawlh ang. Hriatna buhzem pakhat a tling a ni Ziakmi ropui tak mai a ni a. A ropui zia leh a rilzia leh a thukna hi tunhnuah ka ngaihtuah a piangin a chiang telh telh a ni . Sulhnu hlu tak tak a hnutchhiah.A hriatna zawng zawng nena phumbo a han ni erawh a uiawm mang hle mai.

Lehkhabu 23 lai a ziak a. Music, Theology leh History lam a tam hle a ni.History, Music leh Theology lam kutchhuak a ngah hle bawk a. Kristian Hlabu buatsaihna kawnga mi pawimawh a tling pha a. A hla lehlin, KHB- 4 na te hi hla tha a tling. “Baptist Kohhranin Pathian Fakna hlabu staff notation leh Tonic solfa nena awm kawp an siam hi ama sulhnu a ni.

College 3- ah Principal a ni tawh a. Art and Culture Department-ah director a ni tawh bawk a. CMO, Chief Ministerial Office-ah OSD a ni tawh bawk. NEHU hnuaiah Mizoram campus-ah OSD-in a awm tawh bawk a. Mizoram campus bultantu a ni. Historian a ni a. MA Degree chu Gauhati lama a zir hnuah Australia ram Melbourne khua Pathian thu D. Th zir chhuak a ni . Solfa thiam tak a niin, Music a thiamin a hre em em a, Classical Music thlengin a hre ril hle. KTP leh YMA hruaitu hlun a ni a. CYMA OB hlui niin, kohhran upa a ni bawk.

Pu Darchhawna hi Mizo Academy of Letters hruaitu hlun a ni a. President te pawh a lo ni tawh. Mizorama Hindi a darh zauna tura tha thawhhlawk tak a ni bawk. Mizo History Association puipa a tling a ni, kum 34 chhung president a ni. Kohhran leh vantlang thila a inhmanna a ropui a, chawimawina pawh a dawng nasa a ni.

Padma Shree Award (2005)te, Academy Award (2004) te dawng tawh a ,Best Citizen of India (1998), Millenium Award (2000)te, Shri Ganga Sharan Singh Puroskar-1999 te pawh a dawng a. Award leh chawimawina dang pawh a dawng teuh a ni.

Mi tak miril a nihna hi kan chhuang hle a,Hetianga TLC in Prof Dr Darchhawna chawimawina chang hria in a thian mibik-te nen sunna hun an hmang hi ka fak lo thei lo a ni.