Excise & Narcotics Department hnathawkte chuan nizan khan Champhai district-ah methamphetamine kg sawm chuang an man a hemi kaihhnawihah hian mi 2 an man bawk

#ZONEWS July 20, 2025: Excise & narcotics department thupuangtu Pu Peter Zohmingthanga’n a sawi danin nizan dar 11:10 khan Champhai District-a Zokhawthar khaw panna bul, New Hruaikawn kawngah Methamphetamine Kg 10 leh Gram 100 (mum nuai 1 leh sang khat) leh a neitu nia puh – Lunminlalzo (34) Churachandpur, Manipur, tuna Champhai Vengthara khawsa mek nia inchhal chu an man.

Methamphetamine phurhna atana a hman lirthei, Maruti 800 car, pawh hrensak nghal a ni. Tukin zing dar 8:45 khan Champhai, Mualbawk-ah heng Methamphetamine tawlh rukna a inhnamhnawiha puh Christy Hmingthanzami (19) Champhai Vengthar-a khawsa nia inchhal pawh manleh ani a,heng Methamphetamine te hi state pawna hralh tur nia rin a ni.

Methamphetamine vanga mante hi Narcotic Drugs & Psychotropic Substances Act, 1985 tlawhchhanin thubuai siamsak an ni a, vawiin khan Champhai district court-ah hruai nghal an ni.

Tunlai hian Excise & Narcotics Department chuan Aizawl bakah District hmunpui hrang hrangah chhun leh zanah ruihhlo ngai, vaiin beihpui an thlak a. Ruihhlo ngaite thahnem tak hruaikhawmin an zilh thin a, an chhungte remtihna lak hnu-ah ruihhlo ngai enkawlna hmun hrang hrangah te an dah a, thenkhat chu Court thupek angin vantlang hmun pawimawh thenfaitir an ni a. Tunlaia Sawrkarin ruihhlo ngaite puala enkawlna a buatsaih, Hulhliap Short Stay Centre for Addicts-ah te dah an ni nual bawk.