Myanmar raltlante kutzia leh mit-naute lakkhawm hna chu district zawng zawngah July thla tawp lam khan tan a ni.

#ZONEWS August 03, 2025: Hriat theih chinah Myanmar leh Bangladesh atanga raltlante kutzia leh mitnaute thlalak lakkhawm hna (biometric enrolment) hi Serchhip, Lunglei, Champhai, Saitual, Khawzawl, Aizawl, Lawngtlai, Mamit, Siaha, Kolasib leh Hnahthial district-ah te July thla chawhnu lam khan tan a ni tawh a. District tinin biometric enrolment hi July thla chawhnu lam khan an tan vek a, July ni 28 leh ni 29 a tante an awm lai-in a tam ber erawh chuan July ni 30 emaw 31-ah emaw khan an tan ani. Myanmar raltlan awm tam berna, raltlan 13,586 awm ni a chhut, Champhai district-ah chuan July ni 30 khan tan mah se an khawl hmante a chian theih loh avangin an la chhinchhiah tam lo hle a. Tunkar chhovah hi chuan an kal tluan tawh an beisei. Raltlan ngah ber dawttu Lawngtlai district-ah pawh July ni 30 atang khan Chanmari Kanaan Relief camp aṭangin biometric enrolment hi an tan a. Tun thlengin mi 152 (mipa 45, hmeichhia 58 leh naupang 49)-te mit-naute leh kuze thla an la tawh. Lawngtlai-ah hian Myanmar raltlan bakah Bangladesh raltlan 2,000 chuang an awm mek a, an biometric data hi lak vek tura ruahman a ni a. Bangladesh raltlan hi Serchhip district a Thenzawl khawpui-ah 266 an awm bawk. Myanmar raltlan mikhual tam ber pathumna Siaha district pawhin July ni 31 khan biometric enrolment hi an tan tawh a ni.

Tun dinhmunah Mizoramah Myanmar raltlan hi 32,504 an awm mek ni a chhinchhiah a ni a. Champhai district-ah tam berin, Lawngtlai district leh Siaha district te’n an dawt a ni. Kum 2021 February ni 1-a sipai-in Myanmar sorkar thuneihna an pawng lak hnu thla khat vel atang khan Myanmar atang hian raltlan awm tanin an tam lai berin sing nga an tling a ni.