NHIDCL Mizoram Regional Office Executive Director thar an rawh dah avangin Chief Minister-in Central hnenah lawmthu a sawi.

#ZONEWS Aizawl July 23, 2025: Chief Minister Pu Lalduhoma chuan central sawrkarin NHIDCL Mizoram Regional Office Executive Director atana Pu Adelbert Susngi an rawn dah thar avangin Prime Minister Pu Narendra Modi leh Pu Nitin Gadkari, MoRTH chungah lawmthu a sawi.

Chief Minister hian Mizorama National Highway sial hnathawktu bul ber NHIDCL thuneitu sang, Executive Director, Project-in-Charge of Regional Office, Aizawl, Mizoram mawhphurhna chelh turin Pu Adelbert Susngi hi a lo dil tawh a. A hnuah tawngkain a sawi zui bawk a. A dil ang takin Central sawrkar hian nimin khan Executive Director thar ruatna order hi an rawn tichhuak a ni.

NHIDCL Aizawl Regional Office-a Executive Director thar ruatna hi tunkar Thawhlehnia tihchhuah NHIDCL Office Order lehkha tihchhuahah tarlan a ni a. Executive Director thar tura ruat hi Adelbert Susngi a niin Executive Director nilai, chawlh la mek Virendra Kumar Jakhar chu a leave tawp hunah NHIDCL Head Office-a in report tura tih a ni.

Puan tawh angin tunkar Thawhlehni khan Mizo Zirlai Pawl chuan chanchinbumite an kawmna ah Mizoram ei leh bar lakluhna kawngpui pawimawh em em, kal hleihtheih loh khawpa chhiat laia Executive Director Virendra Kumar Jakhar in August ni 7 thlenga chawlh a la chu hriatthiam har an tih thu an lo sawi tawh a. Mizorama awm tlaka an ngaih loh bakah a deputation term a tawp tawh avangin a term pawhsei an remtihloh thu te, Mizorama lo let leh tawh lo tura an hriattir thu te an lo sawi tawh a ni.