Serchhipah Independence Day denchhinin kawng an zawh dawn

#ZONEWS Serchhip August 06, 2025: India Independence Day vawi 79-na denchhena Har Ghar Tiranga hman turah vawiin khan Serchhip DC Pu Paul L.Khuma hoin kawng zawh – Tiranga Yatra neih dan tur District thuneituten Serchhip DC Meeting Hall-ah an rel.

Sawrkar Laipui Ministry of Culture chuan India ram State tinah leh District tinah Har Ghar Tiranga hi hmang turin a hriattir a. He programme peng pakhat atan hian zirlai naupangte, thalaite leh mipui mimir a thei apiangin India hnam puanzar nen kawng an zawh dawn a. Serchhipah pawh he hun hi hman tur niin kawng zawh neih ni tur atan Committee chuan August ni 11, 2025 (Thawhtanni) chawhnu dar 2 a ruat a ni.

Ruahman dan chuan hemi ni hian hmun hnih – P&E Veng Mini Park leh College peng atangin chawhnu dar 2-ah kawng zawh tan a ni anga. Serchhip IOC kawnah intawkin Serchhip DC Pisapui tualzawlah dar 2:30 ah programme tawi buatsaih a ni anga, he programme hi Serchhip DC Pu Paul L Khuma leh Serchhip SP Pu Gavit Gogna te chuan an hmanpui dawn a ni.

Vawiin meeting-ah hian Education Department, I&PR Department, Govt. Serchhip College, Police te leh District thuneitute an tel a. Sub-Headquarters YMA aiawhin President a tel bawk a ni.