Kawnpui leh Sairang inkar kawng chhia avanga an lirthei din tir mek Mizoram Oil Tanker Driver’s Association (MOTDA) te chuan an lirthei an la din tir chhunzawm zel.

#ZONEWS July 23, 2025: MOTDA President Pu Romel Lalruatdika chuan kawng thuam tha turin Mizoram sorkarin hma a la tan ni a an hriat thu leh NHIDCL lam pawhin kawng siamna lung te an chhekkhawl tana an hriat thu a sawi a. Hetihrual hian a hmun ngeiah naktuk emaw a tuk lehah emaw hnathawh hi an enfiah dawn a ti a. Hemi hnuah hian kawng thawm that a nih dan te thlir chungin an kal zel dan tur chu an la ngaihtuah leh dawn a ti.

Pu Romel Lalruatdika chuan a tir atanga an tum angin kawng laka tangkhang tuialhthei rawn phur sa tawh truck te chu dan an tum loh thu leh kawnga tang tlem azawngin tuialhthei an lo phurh luh thu a sawi a. Tun dinhmunah petrol pump nghei hmak tawh chu tlem azawng awm mahse heng lirthei lut tlem azawng leh stock lo neih avanga coupon chauha lak theih nei te leh petrol leh diesel lak tur la nei erawh tlem azawng an awm thu an sawi a ni.

Sorkar, Food Civil Supplies & Consumer Affairs Dept chuan National Highway 6/306 that tawk loh avanga bungraw phur lirtheite’n harsatna an tawh mek leh pawl thenkhatte’n nawrh an huaihawt chungchangah nitin mamawhah harsatna mipuite’n an tawh loh nan Sawrkar chuan theihtawp a chhuah reng tih vawiin khan thuchhuah siamin a sawi a.

Supply Department chuan Furpui intan hmain ngawrh takin monsoon stocking a kalpui avangin buhfai sem kawngah harsatna a awm lo a ti a, tuialhthei pawh Supply Department-in report a dawn danin tun dinhmunah AMC area bikah stock tlema zawng a awm mek a. District dangah pawh District Administration-te hriatpuina hnuaiah stock vil chhunzawm reng a ni.

Hetiang a nih lai hian mipuite pawh mamawh ve dangte hre reng chunga oil mamawh lam khawm kawngah huamhauh fal awmlo turin Department chuan a ngen a. Mipuite’n harsatna an tawh loh nan Sorkarin theihtawp a chhuah mek zel a ni.