Khawzawlah CM Special Package Grant hnuaia thawhpui turte tan training buatsaih a ni.

#ZONEWS Khawzawl, July 24, 2025: Vawiin khan DC Auditorium-ah Bana Kaih scheme hnuaia Chief Minister’s Special Package atana thlan thawhpui turte (progress partner) tan training buatsaih a ni a, Addl. DC Pu Lalfakzuala chairman niin hun a kaihruai.

He training-ah hian Khawzawl Bawrhsap Pu K. Vanlalthiana chuan khuhhawnna thu a sawi a, Khawzawla mipuite hi an fel a, district lian ni lo mah se ropui tak leh sang tak an thlenpui thei a ni tih a sawi a, he special package hnuaia hamthatna leh inzirtirna an dawn tur te an hlawkpui ngei theih nan chhawr tangkaia taima taka thawk turin a chah a ni.

Thusawi zawh hian hian SDC Pu Paul Rokima’n Bana Kaih chungchang tlangpui a sawi a, a thiltum te, a kalphung te leh thawhpui turte hriat tur a sawi lang a ni. Commerce & Industries Extension Officer Pu Chawngdingliana chuan sumdawnna enkawl dan leh mahni invawn dan (Introduction to Entrepreneurship & Basic Business Management) a zirtir a, SELCO Foundation-a Senior Program Manager Pu Lalnuntluanga Colney chuan renewable energy hmanga sumdawnna tihhmasawn theih dan (Development of Entrepreneurship through Renewable Energy) a zirtir a, DRDO Rural Accounts Officer Pu F. Malsawmtluanga chuan bungrua hralh leh lei chhinchhiahna leh pawisa hman dan chhinchhiahna lehkhabu vawn dan (Basic Book keeping) a zirtir a ni. Chairman chuan department hotute a sawm a, an ngaimawh zawng te, thawhpui turte an chah duh te an sawi bawk. SDC R. Lalrinhlua chuan lawmthu sawiin hun a khar a ni.

Progress partner hi Khawzawl district-ah department 7 nena thawkho turin mi 114 thlanchhuah an ni a, department hotute chuan an department hnuaia training telte hnenah certificate an sem nghal a ni.