TUIALHTHEI CHUNGCHANGA HARSATNA CHINFEL A NIH THEIH NAN THUTKHAWM A NI; TUIALHTHEI PHUR LIRTHEITE AN TLAN LEH TAWH DAWN

#ZONEWS Aizawl July 25, 2025 Zirtawpni: Vawiin khan Mizorama tuialhthei tlem avanga mipuiin harsatna an tawh mek chungchangah Chief Minister rawtna angin Pu H. Lalengmawia, IAS, Commissioner & Secretary, Pi Teresy Vanlalhruaii, Secretary, FCS & CA Department leh Mizoram Oil Tankers Drivers’ Association (MOTDA) aiawhte an thukhawm.

National Highway 306 – Kawnpui leh Sairang inkar kawng chhiat avanga Tanker truck driver ten July ni 19, 2025 atanga tuialhthei phurh an tihtawp lailawk avanga harsatna thleng mek chinfel thuai a nih theih nan sawihona neih a ni a, Public Works Department, Government of Mizoram puihnaa NHIDCL-in kawng chhe siam hna an thawh mek chuan duhthusam la pha chiah lo mah se, hmasawnna a awm viau tawh nia hriat a nih avangin mipui harsatna sutkian vat a nih theih nan vawiin ni 25 July, 2025 tlai lam atang khan tuialhthei phur lirtheite tlan tan leh tura thutlukna siam a ni.

Nitin mamawh chungchangah mipui ten harsatna an tawh loh nan heng chakkhai, a bikin – buhfai, gas leh tuialhthei phurhte chu ngaih pawimawh bik an ni ang a, tluang taka chawkluh a nih theih nan Mizoram Sorkar-in hma a la zel dawn a ni.