Lungleiah LMC-in India ram khawpui fai lawmman a dawn lawm dan tur sawi ho a ni

#ZONEWS July 26, 2025: Nimin khan Lunglei Municipal Council (LMC) hnuaia Municipal Sanitation Committee (MSC) chu an Chairman, LMC Vice Chairman Pu K. Lalrinawma hovin Lunglei Convention Centre-a BoC Meeting Hall-ah an ṭhu khawm a. Lunglei khawpui (LMC)-in India ram puma khawpui fai inelna, Swachh Survekshan Award 2024—2025-a ‘Promising Swachh Shehar of Mizoram Award’ a dawn lawm dan tur an sawi ho.

Chairman Pu K. Larinawma chuan India ram puma khawpui fai inelnaah LMC-in lawmman a dawng chu thil lawmawm tak a nih thu leh mipuite ṭan rualna rah a nih thu sawiin, lawm thu a sawi a. He award lawmna leh faina atana thawktu pawimawh tak takte chawimawina hun buatsaih chu thil tih awm tak nia an hriat thu a sawi.

LMC Chief Executive Officer Pu Donny Lalruatsanga chuan ṭhut khawm buatsaih chhan sawi fiahin, thu ngaihtuah tura chhawp chhuahte a sawi zau va. MSC ṭhu khawm chuan Lunglei khawpuiin ram pum huap faina lawmman a dawn chu lawm ngei ṭha ti tlangin, a lawmna hun hi July ni 30, 2025 (Nilaini) chawhnu dar 1-ah buatsaih ni se, an ti a. Hun hman dan tur pawh an duang fel nghal bawk.

Promising Swachh Shehar of Mizoram Award dawn lawmnaah hian official-te bakah, local council leh NGO-te, MJA member-te, NSS leh faina kawnga thawktu pawl leh mimal te sawm ṭha tih niin, councillor ai awh, official ai awh leh local council ai awha thu sawi tur ruat nghal an ni a. He hunah hian sanitation worker-te, bawlhhlawh paih lirthei khalhtu leh bawlhhlawh khawntute, local council hrang hrang huam chhunga faina kawnga thawh hlawk mimal chawimawi phute hnenah chawimawina hlan ni se, tih a ni bawk.