#ZONEWS: Mizo Students’ Union (MSU) huaihawtin Quality Education humhalhna kawng zawh Aizawlah neih a ni.

#ZONEWS: Mizo Students’ Union (MSU), General Headquarters chuan Mizoram Sawkarin Unqualified Part Time Assistant Professor te Contract a pawhsei sak duhlohna lantir nan vawiin khan “Quality Education Humhalhna Kawng Zawh” an huaihawt.

Kawngzawh hi vawiin chawhma dar 11 atang khan Vanapa Hall atanga Higher & Technical Education Directorate Office kawt thleng neih a ni a, he hunah hian college hrang hranga zirlai rualte an tel a, “Unqualified Assistant Professor sorkarin a rawih luih te hi kan duh lo” tih leh ”Tling lo taka zirtirtu hna thawktute hi bang rawh se” tiin an au rual a ni.

He huna thusawitu zinga mi, MSU Vice President – Roluahpuia chuan lungawi lohna lantir chu an tum ber a ni lova, dawhkana sawifel mai theih a ni tih sawiin, thuneitute hnenah vawi engemawzat an thlen hnuah pawh awmzia a awm loh avangin lungawi lohna an lantir tih a sawi a. Kumin February ni 28-a pawhsei sak tawh lo tura sorkarin order a chhuah tawh sut leh tu chu sorkar tho a ni tih sawiin, sorkarin kum 1 atan a pawhsei sak qualify lo te chu zirlaite zirtirtu atan an duh lo a ti a.

Zirna in sang bera Assistant Professor ni tur chuan Minimum qualification ah NET a ni a, kum 1 ah NET vawi hnih exam a awm a, MA pass hlim te pawhin an paltlang theih paltlang theilo te chu chhawr tlaka an ngaihloh thu an sawi a ni.

MSU Vice President chuan Kalphung thar tih au hla hmanga inthlan dawna in zuar te chuan kalphung hlui ang bawkin a tha lo tih hre reng si a, rawih nawn tura ruahmanna an siam chu anmahni inzawt let turin an duh tih a sawi a. Ram leh hnam an hmangaih a nih chuan zirlaite zirtirtu atan a tling ngei te ruai turin an phut tih an sawi bawk.

Directorate Office kawta zirlaite punkhawm lai hian MSU hruaitute chuan Higher & Technical Education Director an kawm a, sorkar chuan tun thla July ni 3 khan heng zirtirtute hnenah hian tun thla July ni 18 thleng insawifiahna hun, show-cause notice an pe a, hemi hnu file kal hun ni 5 dang an nghak leh phawt dawn tih sawiin, Resolution lungrual takin an pass na ah sawrkar chu an thutiama ding tura an duh bakah tun hnua Zirtirtu hnalak ah Qualified teachers te chauh lak thin ni tawh se an ti a ni

#zonews #chanchinthar #tualchhung