SOCIAL WELFARE & TRIBAL AFFAIRS, WOMEN & CHILD DEVELOPMENT MINISTER Pi LALRINPUII’N SSWRC MAUMUAL, CHANDMARI A TLAWH

#ZONEWS AIZAWL July 29, 2025: Vawiin khan Social Welfare &Tribal Affair,Women & Child Development Minister chuan Pi Lalrinpuii chuan SSWRC(State Social Welfare & Rehabilitation  Centre) ,Maumual, chanmari a tlawh. SSWRC Superintendent Pi Lalnunmawi leh staff ten Minister hi lo hmuakin, SSWRC-a Skill Development Centre, Shakti Sadan-I, Protective Home, Alzheimer  Home sak lai leh Superintendent office te an fan pui. Minister hian Skill Development Centre-a Computer  &Publishing Centre, Beauty &Wellness  section, Tailoring section, Handloom section-a inmates trainee te chu  SSWRC nuam an tih leh tih loh te, an thil zira an hmasawn dan te zawtin anmahni biangbiakna hun reilo  a hmang.

SSWRC- a establishment hrang hrang a tlawh zawh-ah hian inmates 48 te nen SSWRC Auditorium-ah programme tawi te hman a ni a. He programme hi  Dr.Lalhriatzuali Ralte, Director, Social Welfare & Tribal Affairs  chuan kaihruaiin, Pi Lalnunmawi, Superintendent of SSWRC  chuan  SSWRC inenkawl dan leh an hmalak tawhna leh hmachhawp te report a pe.

He hunah hian thu sawiin  Minister Pi Rinpuii chuan Superintendent leh staff ten SSWRC an enkawl danah a mit a tlung hle thu sawiin, Pathian malsawm tlaka thawk zel turin a chah hlawm. Minister chuan hmelchhiat chiah a sim thei loh, thil dang chu a sim thei vek a ni tiin,Lal Isua leh Uire Nu chanchin kha tehkhin thu-ah hmangin, Isuan Uire nu kha a ngaidam a, mahse tihtur a tuk a ni, chu chu “kal la, tun hnuah tisual leh tawh suh” ti kha a ni a. Vawiina SSWRC inmate te hi Isuan a ngaidam thei che u, mahse in tisual leh hi rem a ti lo. Ruihhlo in Mizoram a ti buai zia kan hria a, Sawrkar thar a lo pian  pawh khan kan mangang a, Ruihhlo do hi policy pawimawh ber pakhatah kan nei a ni.  Kan CM pawh hian Ruihhlo  ngawlvei te hi a vei em em a, Swearing-in ceremony  zawh ve leh khan TBCC a zuk tlawh nghe nghe a ni kha. Chutiang chuan sawrkar chuan ruihhlo do leh a ngawlvei te enkawlna kawngah theitawp a chhuah mek zel a ni, a ti.

SSWRC inmates ten kawng dik an zawha, leirem an rah theih nana thil pawimawh nia a hriatte sawiin Minister chuan   pakhatna-ah chuan Pathian hnena intukluh a ngai, thil dang in en chuan in tlu leh thin ang.Pathian  en tlat ang che u. Pahnihnaah chuan tumruhna nei, nuam takin sual hi a sim thei lo, tumruhna nena beih fat fat ang che u. pathumnaah chuan- Tawrhchhel a ngai: mi tawrh zuau ten sual an do hneh ngailo, thil tha kan hmuh duh chuan tawrh ve pawh i huam ang u, tawrh chhung a rei lovang. Palinaah chuan -min enkawltute thu awi a ngai.  Sual sim tur chuan thu awih tura kan inpuahchah hmasak a ngai hle a ni, a ti. 

SSWRC inmates tam zawk chu fa nei tawh an nih avangin Minister chuan anmahni fuihna thuchah pawh  sawiin, Bible in min hrilh angin naupan laia thil zirtir hi naupang te hian an thlah ngai lo. Chuvangin  SSW Rehabilitation Centre in chhuahsan hunah pawh in NUN khan in fate zirtir rawh se. In tawngtai lai, in hnathawh lai, nun kawng dik zawh a, leirem rah ve tuma theitawp chhuaha in beih fat fat lai kha in fa ten hmuh rawh se tiin, Inmates te chu ruihhlo tel lova, Pathian vuan chunga nun hlim awm tak an hman leh theuh theih nan duhsak a hlan. 

Pi Lalnunmawii,  SSWRC Superintendent in a tarlan danin,SSWRC -ah hian  staff 24, hmeichhia 17 leh mipa 7 an ni a.  50 Capacity-ah Inmates 48 leh naupang 2 an awm mek a. vcancy seat 2 a la awm a ni. SSWRC-a  Inmates te awm hun chhung hi thla 7 a ni thu leh  SSWRC atanga chhuak thahnem takin  SSWRC Skill Development Centre atanga thiamthil an zir hmanga  eizawnna tha tak an nei thu leh nunphung pangai zawha  chhungkaw tha tak din leh an tam thu a sawi.

Vawiin SSWRC tlawhna-ah hian Minister hi,  Social welfare & Tribal Affairs, Women & Child Development Secretariate atangin Pi Lalzarmawii IAS, Commissioner  & Secretary, Jt. Secretary Pi Zonunthari  leh adt.,  Social Welfare & Tribal Affairs atangin Director Dr.Lalhriatzuali leh adt., Women & Child development atangin Pi Zoramthangi Chhangte, Director leh officer dang ten an tawiawm a ni. 

Vawiin SSWRC Auditorium-a programme hmanah hian inmates te atangin Duet leh Group zai te ngaihthlak a ni a.  Programme chairman Pi Dr.Lalhriatzuali chuan lawmthu sawinain hun a khar ta a ni.