INDIA BLOC TEN CHIEF ELECTION COMMISIONER PAIH AN TUM

#ZONEWS #POLITICS August 20, 2025:
Opposition Party, INDIA block leh Chief Election Commissioner (CEC), Gyanesh Kumar inbeihna chu a kal na tial tial a. Nimin khan INDIA bloc hruaitute chuan Chief Election Commissioner chungchang hi rei lote an sawi ho a. A constitutional duty zalen leh hleih nei lo a thawk tur a nih chu a kengkawh lo a. Ban tir (impeach) mai lo chu kawng dang awmin an hre ta lo. “Chawlhni kal ta, Augast ni 17, 2025 a CEC in Press Conference a neihah zawhnate chhanga sawifiah mai tura ngaih a nih laiin ruling party spokes-person ang maiin a che ta chiam mai a ni. Impeachment chungchangah hian Parliament leh Danhre mite (Legal) lam pawh kan rawn tawh a, hengte hi a hun takah tangkai takin kan la hmang ang,” an ti.

Nimin khan Opposition Party 8 tangrual Congress, DMK, TMC, Samajwadi Party, CPI, CPI(M), AAP, Shiv Sena (UBT) aiawhte chuan Press Conference an ko a. CEC hian Bihar a Special Intensive Revision (SIR) leh a kaihhnawha kan zawhnate a chhang fiah thei lo a. A leh a lingin min bei ta vak a ni,” an ti.

TMC hruaitu Abhishek Banerjee chuan, “Election Commission of India hi a lai (nutral) lo a, hleih a nei a, constitution zahawmna chu an kengkawh bawk hek lo. Chuvangin a theihna apiangah kan bei dawn a ni. No confidence move tur hian ni 14 a rei notice pek a ngai a. Parliament session hi tunthla ni 21-ah a tawp dawn a. Tun session-ah chuan hun a awm tawh lo a. Tun Session-ah hun awm tawh lo mahse session lehah tal no confidence hi kan move ngei ngei ang,” a ti.

CEC hi Parliament in a paih thei a. Supreme Court leh High Court Judge-te paih dan ang chiahin a motion hi Rajya Sabha MP 50 emaw Lok Sabha MP 100 emaw talin Parliament a an move a ngai a ni. Tin, Constitution Art. 324(5) in a phut angin Parliament a MP awm (present) hmun 3 a then a hmun hnihin an pawm (vote) a ngai bawk.

Rahul Gandhi chuan, “Bihar MLA inthlan kumin a awm tur leh kum 2029 a Lok Sabha MP inthlan hunah kan chak dawn a. Chief Election Commissioner leh a thawhpui Election Commission Member pahnihte hi lo pension tawh mahse kan hrem tho tho ang,” a ti.