Siaha-ah Har Ghar Tiranga-2025 lawm dan tur relin an thukhawm

#ZONEWS Siaha August 04, 2025: India in zalenna a hmuh champha vawi 79na (79th year of Independence) denchhanin Siaha-a Har Ghar Tiranga – 2025 lawm dan tur vawiin khan rel a ni a, DC Pu VL Hruaizela Khiangte kaihhruaiin a office chamber-ah thutkhawm a ni.

Siaha District Bawrhsap Pu VL Hruaizela Khiangte chuan Ministry of Culture, Govt of India in India ram pumah Har Ghar Tiranga-2025 chu August Ni 2 atanga Ni 15 inkarah hman tura thuchhuah a lo siam tawh angin Mizoramah pawh hemi hun chhung hian Art & Culture Department bultumin District tinah hman a ni dawn a ti a, a lawmna hun hi Phase -3 a then niin phase tinah hmalak dan tur leh tih tur tul leh pawimawhte sawiho tura meeting koh a nih thu a sawi.

Vawiin thutkhawm chuan Har Ghar Tiranga lawmna thawhkhatna (2nd – 8th August) ah chuan Siaha District chhunga Primary School, Middle School, High school leh Higher Secondary School pakhat theuh thlanchhuahah India flag kaihhnawih ‘wall painting’ ziah tur tih chu MADC Education Department leh DEO te kuta dah a ni a, Ni 8 hmaa school te thlang fela wall painting hi zo turin leh documentation pawh a tul anga tihfel nghal tur a nih thu tarlan a ni.

Har Ghar Tiranga thawh hnihna- 2nd phase chu Aug Ni 9 atanga 12 chhung niin hemi hun chhung hian Kawngzawh/ Yatra neih a ni dawn a, meeting chuan August Ni 12 ah kawng zawh hi neih nise tiin Siaha Vaihpi Field atangin Traffic point chu kawng zawhna tur atan an thlang fel bawk a ni. Hei bakah hian I&PR Department chu he Programme chhung zawnga documentation felfai taka vawng tur leh ‘Selfie with Tiranga’ te portal an upload thin tura ruat an ni bawk.

Har Ghar Tiranga thawh thumna-3rd phase (13-15th Aug, 2025) ah thung chuan Sawrkar building, Zirna In, Hotel ah te leh Mimal inah te India flag zarna runpui neih a ni dawn bawk a ni.

Vawiin meeting-ah hian DC Pu VL Hruaizela Khiangte, Addl DC Pu Abraham Beirazi Khithie, SDC Pi Zorinpuii te bakah MADC leh Mizoram Sawrkar Education Department aiawhte an tel a ni. ‎