CHIEF MINISTER-IN PM EKTA MALL SATU TUR TE LEH DIRECTOR GENERAL, NECTAR A KAWM

#ZONEWS Aizawl August 08, 2025: Nimin khan Chief Minister Pu Lalduhoma chuan Aizawla PM Ekta Mall satu tura thlan, Ministry of Health & Family Welfare hnuaia Public Sector Urdertakings, HLL Infra Tech Services (HITES) thuneitute chu New Delhi Mizoram House-ah a kawm a. An hnathawh tur chungchang a sawipui.

Mizoram Ekta Mall hi tun thla ni 23 ah a lung phum tura ruahmanna kalpui mek a ni a. A sak hna hi tan nghal a ni ang.

Chief Minister hian, a hun taka sak zawh tum tur leh quality tha taka sa turin a chah a. Tuna Aizawla RIPANS an sak mek pawh a hun taka zo ngei turin a hrilh.

Nimin tlai vek khan Chief Minister hian Director General, NECTAR ( North East Centre for Technology Application and Reach) Dr. Arun Kumar Sarma chu a kawm bawk a. PM DevINE hnuaia Buangpuia Changel sawngbawlna Project an kalpui mek chanchin sawipuiin, hna chak taka an thawh theihna tur leh a thawh zawh thuai theih dan tur te an sawidun.