RAMSANGA LEH THAZUALA TE BWF WORLD JUNIOR BADMINTON CHAMPIONSHIP 2025 KHEL TURIN AN IN VAW TLING

#ZONEWS #INFIAMNA August 11, 2025:
Kumin October thla a neih tur, Yonex-Sunrise BWF World Junior Badminton Championship 2025 khel turin Mizoram badminton player pahnih, C. Lalramsanga leh H. Lalthazuala te chu an in vaw tling. August ni 9 – 14, 2025 inkar chhung hian National Centre of Excellence, Guwahati-ah Selection Trial neih a ni a, hetah hian Mizo player pathum, C. Lalramsanga, H. Lalthazuala leh Lalrempuii te koh an ni a, Mizo zinga Junior World Badminton Championship khel thei hmasa ber ni turin Sanga leh Thazuala te an in vaw tling a ni.

C. Lalramsanga, s/o C. Lungmuanpuia, Durtlang, tuna Mission Veng Badminton Club tana khel hi Mixed Doubles leh Boy’s doubles ah te trial hmachhawn turin koh a ni a. Mixed doubles-ah Taarini Suri nen tangdun in, vawi 4 khelh ah vawi 3 an chak a, khawvel huap inelna lian hmachhawn turin an tling. Boy’s doubles ah hian Bjorn Jaison nen tangdun in, inelna an la hmachhawn mek thung.

Tin, H. Lalthazuala, s/o H. Zohmangaiha, Chanmari West, tuna Chanmari Shuttlers Club tana khel mek chu Boy’s singles category-ah a inlan a. Vawi 4 khelh ah vawi 3 chakin, India no 1, Ansh Negi pawh straight set a a hneh zingah a tel. Khawvel huap inelna liana India ai awh turin a invaw tling bawk a ni.

He Selection Trial ah hian Badminton Asia Junior Championship, Solo, Indonesia a neih zawh taka India aiawh tute bakah Badminton World Federation (BWF) leh Badminton Association of India (BAI)-a ranking nei sang te koh an ni a (BWF top 20 leh BAI top 8 chin te). India rama a tha ber leh thiam ber ber ten India ai awh thei tura chungnung zawk nih an inchuhna boruak sâng takah Sanga leh Thazuala te hming a langsar. Member 28 awmna India team-ah an tel dawn a, North East India atanga tel thei awmchhun an ni bawk.

Lalrempuii, d/o Albert Lalrosanga, Serchhip pawh Girl’s doubles ah inlan in Zenith Abbigail nen an tangdun a, vanduai zawk ah an tang thung.

Mizoram Badminton Association chuan vawi tam tak Mizoram lo tihmingtha tawh thintu kan player te hi a chhuang in, an hlawhtlinna ah a lawmpui tak zet a ni.