Saitualah National Deworming Day August Round 2025 hawnna neih a ni.

#ZONEWS Saitual August 11, 2025: Vawiin khan Govt. Saitual High School, Saitual Chawnpui Vengah naupang kum 1 atanga 19 inkar ten rulhut an pai lohna tura rulhut hlo pek beihpui leh rulhutin a nghawng thalote inzirtirna, National Deworming Day (NDD) August Round 2025 hawnna hun hman a ni a, Pu Lallawmawma, Addl. DC chu khuallian niin a hawng nghal a ni.

He hunah hian Addl DC. Pu Lallawmawma chuan thu sawiin, National Deworming Day thawhhnihna hawnna hun tha tak an hmang thei chu lawmawm a ti a, a hlawhtlin theih nana thawk zawng zawng te chungah lawmthu a sawi a ni. Khuallian chuan zirlai naupangte chu hriselna ngai pawimawh turin a chah a, hna tha taka thawk tur leh lehkha tha taka zir tur chuan kan hrisel phawt a tul a ni, a ti.

Addl DC chuan tunlai zirlai naupangte chu an vannei hle tih sawiin, taima leh thawkrim tan chuan hlawhltinna tur kawng tam tak a inhawng a ni, a ti a, naupangte chu an zirlai ngawr ngawr piah lamah Sawrkar schemes hrang hrang te ngaihven turin a chah bawk. Khuallian chuan zirlai naupangte chu vawiina an ngaihthlak, rulhut ina a nghawng tha lo tak tak te leh rulhut damdawi ei pawimawhzia te chu an chhungte leh thiante hnenah hrilh chhawng theuh turin a chah nghal a ni.

Vawiina NDD 2025 thawhhnihna hawnna hun hi Pu Laldingliana, DEO chuan a kai hruai a, thusawi hi khuallian, Pu Lallawmawma, Addl. DC hnen atanga ngaihthlak niin, Dr. Rosiamliani Bawitlung, DPM chuan NDD chungchang a sawi zau a, naupangte chu kut sil dan dik a zirtir bawk a ni. Vawiin hun hmanna hi Pu Lalhmangaiha, Dy DPC chuan lawmthu sawinain a khar a. NDD 2025 hawnna pual hian Sikul naupangte chu rulhut hlo (Albendazole) pek nghal an ni.

National Deworming Day (NDD) 2025 thawhkhatna hi kumin February ni 10 atanga ni 17 khan neih a ni tawh a, a thawhhnihna hi August ni 11 atanga ni 18 thleng neih leh tur a ni. Hemi hun chhung hian District chhunga zirna in hrang hrangah rulhut hlo (Albendazole) a huhovin ei a ni dawn a, tumah hmaih an awm loh nan a thualnawnna (Mop Up Day) August ni 18, 2025-ah neih leh tur a ni.