NATIONAL DISASTER MANAGEMENT AUTHORITY TEN MIZORAM AN LO TLAWH

#ZONEWS Aizawl August 11, 2025: Vawiin khan National Disaster Management Authority (NDMA) hotute chu Mizoram-a khuarel chhiatna thleng thin leh Mizoramin chhiatna a hmachhawn dan chungchangte belchiang tur leh a tul anga hmalak dan turte rel turin Mizoram-ah an lokal a, State Disaster Management Authority leh DM&R Department hotuten Lengpui Airport-ah lo hmuakin an lo dawngsawng.

Vawiin vek khan NDMA Officials-te hian, Aizawl leh Lengpui inkar (Pukpui) kawnga lung tlak thinna hmun an tlawh nghal a; Pukpuiah hian kumin April ni 28 khan lung tla-in Pu Lalrinliana, Falkland-te chhungkaw chuanna Motor delhin, amah bakah a nupui leh an fanu ten nunna an lo chan phah tawh a ni.

Ruahman dan chuan NDMA hotute hi naktuk August 12, 2025 hian District thuneitute leh mi pawimawh dangte nen an thukhawm dawn a, State Emergency Operations Centre, Aizawl an tlawh nghal ang. August ni 13, 2025-ah Champhai District leh Khawzawl District-a khuarel chhiatna thlen nasat zualna hmunte tlawh lehin District Emergency Operations Centre-te an tlawh nghal bawk dawn a ni.