Mizorama sumdawng tenaute chawilarna, tihhmasawnna leh tihchakna turin, Workshop on Promotion, Development and Empowerment of MSME in Mizoram chu vawiin khan Dawrpui Multipurpose Hall-ah buatsaih a ni.

#ZONEWS Aizawl August 20, 2025: Mizorama sumdawng tenaute chawilarna, tihhmasawnna leh tihchakna turin, Workshop on Promotion, Development and Empowerment of MSME in Mizoram chu vawiin khan Dawrpui Multipurpose Hall-ah buatsaih a ni.

Mizoram sorkar hnuaia Commerce & Industries Department buatsaih, MSME Workshop-ah hian Ministry of Micro, Small & Medium Enterprises (M/o MSME) Secretary, SCL Das chuan thu sawiin, Mizoram hmun hrang hranga MSME hnuaia sumdawnna tenau kalpui mekte chuan theihna tam tak an neih bakah hmalam hun eng tak an ni tih a hmuh theih a ti a, hetihrual hian an theihna chu hlawhtling leh tha zawka an kalpui theih nan Ministry of MSME leh Mizoram sorkar chuan nasa zawka hma an lak a, hna an thawh a tul tih an lantir a ni a ti a. Sumdawnna bultan leh kalpui chu thil awlsam a nih loh avangin sorkar laipui chuan ram mipuite tan theihtawp a chhuahpui a, MSME hmalakna chuan Mizoram kil tawp thleng se, Mizorama MSME hnuaia sumdawng inziaklut zat chu nasa taka pungin, hmasawn zel turin an duh a ti a, hemi tur hian Mizoram sorkar hnuaia department hrang hrangte leh agency hrang hrangte hmalakpui turin a sawm a ni.

He hunah hian Chief Secretary Killi Ram Meena leh Mizoram Commissioner & Secretary Dr.Lalzirmawia Chhangte pawhin thu an sawi a, programme tan hma in stall an tlawh kual bawk a, MSME Ministry hnuaia scheme hrang hrang te leh a kalpui dan te zirho a nih bakah, MSME hnuaia sumdawnna tenau enkawltute chuan Ministry of MSME leh Mizoram sorkar hnuaia officer lo kalte nen inkawm hona hun an nei a ni.