Chin ralthuam keng pawl pahnih inkah avanga Champhai district Zokhawthar a raltlan lut chu mi 3,000 an chuang tawh.

Chin ralthuam keng pawl pahnih inkah avanga Champhai district Zokhawthar a raltlan lut chu mi 3,000 an chuang tawh.
Champhai district Police hotute hnen atanga Akashvani Aizawl thu dawn danin nimina Chinland Defense Force – Hualngoram leh Chin National Defense Force (CNDF) inkahna avang khan vawiin thlengin mi 2,845 chu sahimna zawngin Zokhawtharah an rawn tlanchhia a. A hma, Nilaini atanga CDF-Hualngoram leh CNDF te an inkah hnu khan a mi 400 thelh raltlan an lo awm tawh bawk a. Raltlan tam ber hian an chhungte an bel a, belh tur neilo te chu Zokhawthar YMA Hall ah dah khawm an ni. He tih lai hian CDF-Hualngoram sipaite inkulhna hmun zawng zawng, an hmunpui ber Tuichirh camp tiamin CNDF hian an laksak fai vek tawh a. CDF-Hualngoram awp chin zawng zawng pawh la vekin CNDF hian an awp fel tawh a, silai ri pawh nimin tlai atang khan a reh zui a. CDF-Hualngoram mipui sipaite chu an tlan darh vek tawh bawk a, a then chu Mizoram lamah an lo lut a ni.
Hualngoram People’s Organisation (HPO) hotu pakhatin phone hmanga Akashvani Aizawl a hrilh danin CNDF chauh ni lovin anmahni puitu Chin Brotherhood hnuai a pawl hrang hrang ralthuam kengten chuan an tam hneh tak avangin CDF-Hualngoram mipui sipaite chuan an camp-te an hum zo ta lo a. An tlan darh ta vek niin a sawi a. An mite zinga mi 5 an hliam thu sawiin, 4 chu Zokhawthar damdawi-ina enkawl an nih lai-in pakhat, a hmai a kah chu Champhai district hospital ah enkawl a nih thu a sawi.
Nimin khan chawhma dar 8.45 vel atangin silai a ri tan a, CNDF hian Haimual hnuai atang leh Rihkhawdar dai atanga hualin Khawmawi leh Rihkhawdar a awm CDF-Hualngoram te hian an kap let ve na a, an intam hleih em avangin chawhnu dar 2.30 vel khan an camp-te rauhsanin an tlan darh ta vek a. An awmna hmun hi CNDF sipaite hian an luah bakah HPO hmanga tualchhung sorkar an lo kalpuite pawh CNDF hian chhuhsakin an awp zui ta a ni.
He inkahna-ah hian hriat theih chinah CDF-Hualngoram mi Lalliandinga leh C. Lalhmuakliana te chu kahhlum an ni a. CDF-Hualngoram mi tho mi 2 chu an inkah palh vanga thi ni a thuthang a awm na-in finfiah theih a la ni lo. CNDF lamah sipai 2 an hliam a, Zokhawthar-ah damdawi lama enkawl an nih thu an sawi bawk.
CNDF-te hi Interim Chin National Consultative Council (ICNCC) hnuai a ralthuam keng pawl Chin Brotherhood (CB) nena thawkho an ni a. CDF-Hualngoram erawh hi chu Chin National Front (CNF) leh ralthuam keng pawl Chin National Army (CNA) telna pawl hrang hrang 18 vel insuihkhawmna Chinland Council (CC) a tel a ni thung a. Kumin February ni 26 khan chief minister Pu Lalduhoma din ‘Advocacy Group for Peace in Chinland’ remruatna-in ICNCC leh CC te hian Aizawla CM chenna inah inremna an lo ziak tawh a. Chinland National Constitution duangtu tur pawh pawl 2 aiawh leh Advocacy Group for Peace in Chinland aiawhte nen an ruahman mek lai-in inkahna hi a thleng ta a ni a. Inkahna-ah hian CC a tel pawl dang, CNA tiamin an inrawlh ve lo ni a hriat a ni.
Khawmawi leh Rikhawdar a CNDF leh CDF-Hualngoram te nimina an inkahna a thi C. Lalhmuakmawia (37) chu Aizawl Chanmari West-a an in thlenpui a ni a, vawiin tlai dar 3 khan vui a ni.