NASHA MUKT BHARAT ABHIYAAN, AIZAWL DISTRICT AN THUKHAWM

#ZONEWS Aizawl October 15, 2025: Vawiin khan Nasha Mukt Bharat Abhiyaan (NMBA), Aizawl District-te chu DC Conference Room-ah an thukhawm a.

He meeting hi Er. Lalhriatpuia, IAS, Deputy Commissioner & Chairman, Aizawl District Nasha Mukt Bharat Abhiyaan-in kaihruaiin, Pi Lalhlupuii Sailo, CEO, Mizoram Social Defence & Rehabilitation Board, Social Welfare Department-in Nasha Mukt Bharat Abhiyaan hmalak tawhna leh hmachhawpte presentation neiin a hrilhfiah a ni.

Meeting-ah hian Superintendent of Police, Addl. Deputy Commissioner (G), District Legal Services Authority, Chief Medical Officer Aizawl ‘E’ & ‘W’, District Social Welfare Officer Aizawl ‘E’ & ‘W’, District Education Officer, CDPO, ZDRB, SHALOM, CYMA aiawhte an tel a ni.

Nasha Mukt Bharat Abhiyaan (NMBA) hmalakna hi India ram chhunga District 372-ah kalpui mek niin, kumin hi kalpui tan a nih atanga a kum 5-na a ni a; hemi denchhen hian November thlaah Ministry of Social Justice & Empowerment, Govt. of India chuan PM Event liantham tak buatsaih a tum a. Chumi atana inbuatsaih dan tur relho a ni.