Khawzawlah Museum, Archive records exhibition & book sale neih a ni

#ZONEWS Khawzawl October 15, 2025: Vawin chawhma dar 10 khan Electric veng YMA Hall-ah Art & Culture department Annual Working Program 2025-26 hnuaiah Exhibition & Book sale 2025 chu ni 15 leh 16 October 2025 chhunga neih tura buatsaih a ni a, Khawzawl Bawrhsap Pu K. Vanlalthiana chu a khuhhawnnaah khuallian a ni.

Khuallian Pu K. Vanlalthiana chuan Museum, Archive Exhibition cum book sale chu a ngaihhlut thu sawiin nakin zel atana Mizote sulhnu siamtu pawimawh tak a ni tih a sawi a, lo kal khawm thalai te pawhin an hlawkpui ngei a beisei thu a sawi a ni.

Exhibition & Book sale-ah hian Art & Culture Department hnuaia subordinate office pali – Mizoram State Museum, Mizoram State Archives, Tribal Research Institute leh Mizoram Publication board ten museum bungraw hlu taktak chi hrang hrang 90 Mizoram chhung leh pawn leh India ram pawn thleng museum objects an rawn phochhuak a, Mizoram state Archives in Mizoram document pawimawh leh hlu taktak an rawn pholang bawk a, Tribal Research Institute leh Mizoram Publication Board atangin lehkhabu tha leh hlu man tlawm taktak in a duh apiang lei theihin phochhuah a ni bawk. Exhibition chu District hrang hrang ah kumtin neih an tum bawk a ni.

He hun ah hian Khawzawl a School naupang leh zirtirtu zawng zawng te sawm an ni.