Special Awareness Campaign on Legal Provisions and Matters for Government officials of Mizoram buatsaih

#ZONEWS Aizawl October 23, 2025 : Vawiin khan Mizoram Legal Service Authority leh ATI tangkawp buatsaih Sawrkar hnathawkte tana Dan chung chang inzirtirna – ‘Special Awareness Campaign on Legal Provisions and Matters for Government officials of Mizoram’ tih chu ATI Auditorium-ah hman a ni. Hetiang training hi District zawng zawngah neih tum a ni a, a thawh khatna atan Aizawl District hman a ni.

He Programme hi Hon’ble Mr. Justice Michael Zothankhuma, Gauhati High Court Judge leh Executive Chairman, Assam SLSA chu Khuallian niin a hmanpui a. Hon’ble Mrs. Justice Yerenjungla Longkumar, Gauhati High Court Judge chu Khualzahawm a ni.

Khuallian Pu Michael Zothankhuma chuan Dan hriatna hi tha taka hna kan thawh nan a pawimawh hle thu sawiin IPC chu BNS in a thlak tawh thu te, Dan bawhchhiate hremna leh tuartir ngawr ngawr lam ni tawh lovin mipui vantlang tana service tha pekna atan hman a nih tawh thute a sawi a. Technology advance tak karah hian Court thurem dan pawh a dang lam chho zel a, Court a inkhinna pawh Court chhungah kher ni lo, online hmangte pawh tih theih a ni ta zel a, a awlsam ta hle a ni.

Khuallian chuan tunlai media chak takah hian kan thusawi leh tithe pawh fimkhur a tul tawh a, media hi mitin dikna chanvo humhalh nan hman tangkai a tul tawh thu te, dan bawhchhiate hrem loha an chhuak leh mai thinte pawh sawrkar hnathawkin kan tih tur kan tih tawk loh vang a ni tel a, tan lak a tul thu a sawi bawk.

Khual zahawm Pi Longkumari pawhin thu sawiin Fundamental rules kan neih lai hian mipuiin kan tih ve tur lam – Fundamental duties hriatna kawngah tan lak a tul tawh thute a sawi a. Mi diklote hremna kawngah danleh hrai hriat te, service matter leh inhremna dan hriat te leh conduct rules te pawh kan hriat chian a tul hle tawh a ni, hemi atan hian sawrkar hna thawkte hi an pawimawh a, tan la sauh sauh turin a fuih bawk.

Training-ah hian Sawrkar hnathawk 100 chuang zet an kal a ni.