CHIEF MINISTER-IN YMA INKHAWMPUI LIAN VANTLANG INKHAWM TELPUI

#ZONEWS Sakawrdai October 23, 2025: Nizan khan Young Mizo Association Inkhawmpui lian vawi 75-na, zan hnihna Vantlang Inkhawm chu Chengkawlawn Run, Sakawrdaiah neih a ni a. Chief Minister Pu Lalduhoma chuan khuallian niin a telpui.

Thusawiin Chief Minister chuan, inkhawmpui palaite chibai a buk a, chawimawina dawngtu zawng zawngte a lawmpui. YMA chu a awmna hmun apianga mipuite thlamuantu a nih avangin mitin tana pawl tangkai a ni. Ramria kan buaiin YMA in lo lang a, khuarel chhiatna kan tawhin YMA hmel kan hmu a. Zofate insuihkhawmna kawngah ni se in tangkai reng thin, a ti.

Chief Minister thusawi langsar dangte chu :

1. Zofate huikhawmna kawngah hian sorkar pawhin hma kan la nasa a, Mizo Diaspora Cell kan din a, Mizo DiasporaHub portal kan siam bawk a. Tun hnai lawkah pawh Singapore-a hnathawka awmte harsatna chu kan bawhzuisak a ni.

2. Hnam zia leh tihdan vawnhim kawngah YMA ten in thawhhlawk thin a. In hmalakna tichak turin sorkar chuan Thingsulthliaha YMA rama Centre sakna tur Rs. 100 Cr. kan ruahman a ni.

3. YMA leh sorkar thawhhona Ruihhlo do Task Force kan tinung thar a, Hulhhliap Short Stay Centre kan kalpui dun a, Operation Jericho kan kalpuiho mek bawk. Sorkar leh YMA te thawhhona dang tam tak sawi tur a awm.

4. YMA member-te hi eirukna dopuiah ka sawm che u a ni. Mahni chhungkuaa bul tanin eirukna suma lei thilte lo duh lo ngam turin ka ngen a che u.

5. Security Coordination Committee thutkhawm hnuhnung ber report-a a lan danin kan ramah rukruk case a sang fal hle a. Thingfak leh suka kawngkhar do mai mai thin hnam kan nih thin kha hriain, eiruk leh rukrukna lam chi hi chu i do tlat ang u.

6. Internet khawvelah kan tawngkam kan duh tui lo thin a, kan milar leh Artist te kan sawi zui duh dante a mawi lo thin hle. Hnam dangte pawhin hei hi min hriatpui a ni. Tumah mi fel famkim kan awm loh avangin chin tawk i nei thiam ang u.

7. ILP kenkawh dan tur tha zawk sorkarin a duang mek a. ILP neilote hi chu Branch tinten kan venga an awm hi phal lo ila, dan an zawm tha lehzual ang.

8. Hruaitu thar thlan kum a ni a. Member-ten in thlantlin apiang chu sorkar pawhin lungsi takin kan lo thawhpui dawn a ni, tih te an ni.

Nilai zan vantlang inkhawm hi Pu Lalhmachhuana, President, Central YMA chuan a kaihruai a, Prof. Chawngkhuma Chawngthu, President, Sub-Hqrs, Siaha chuan hunserh hmangin, Prof. Malsawmliana, General Secretary, CYMA chuan kumpuan thupui ‘Ram leh hnam humhalh’ hmangin thusawina a nei. Central YMA, Joint, Group leh Branch Zaipawlte leh malzai te a awm a, hruaitu hlun chawimawina leh Branch YMA chanchinbu tha lawmman an sem bawk.

Inkhawmpui report bua a lan danin YMA hian Branch 827, Group 49, Sub Hqrs 9 a nei a. Mizoram pawnah Assam, Meghalaya, Manipur, Tripura leh Nagaland ah Group leh Branch a nei a, Bangladesh-ah Branch pakhat Sajek Branch a nei bawk. Member zawng zawng hi 507267 niin an zinga 295905 hi mipa an ni a, a dang 211362 hi hmeichhia an ni. Life Member 12068 an awm a, hruaitu hlun chawimawina dawng tawh 3352 awmin, tun inkhawmpuia chawimawina dawng thar tur mi 176 an awm.