Chawngtlaiah Community Weaving Centre hawng

#ZONEWS Khawzawl October 31, 2025: Vawiin khan Chawngtlaiah Community Weaving Centre hawn a ni a, Pu Vanlaldina Fanai, Commissioner & Secretary to the Govt. of Mizoram, Planning & Prog. Implementation Department chu khuallian niin Centre a hawng.

Khuallian Pu Vanlaldina Fanai chuan Centre hawnna hun a hman pah in project a hlawhtlin avanga lawmthu a sawi bakah project hrang hrang te Sailam khuaah hlawhtling taka kalpui a lo nih tawh thin avangin Sailam mipuite chungah lawmthu a sawi a. Mipui te tangrual zel tur leh hma sawn zel tum tur a fuihin, sawrkar lam pawh in tanpui tlak te chu tanpui zel tura an in hawn thu a sawi a ni.

He hunah hian Pu Lalmalsawma Pachuau, Secretary, Planning Department chuan hun kaihruaiin Pi Saidingpuii Sailo, Project Coordinator bakah Village Council member leh Chawngtlai Handloom Association member te hnen atangin report ngaihthlak a ni a. He project hi mipui ten an hlut in an chhawr tangkai hle a, hmasawnna rahbi thar an kai a ni tih an sawi a ni.

He hunah hian Pu K. Vanlalthiana, Khawzawl Bawrhsap, Pu Isak Lalmuanpuia Chuaungo, Deputy Adviser, Planning Department, Pu Rinzuala, CEO, Mizoram Startup Mission, Pu Lalfakzuala, CEO Bana Kaih Handholding Scheme, Pu K. Lalhmuakliana, Project Director, DRDO te an tel a ni.

Chawngtlai Community Weaving Centre, Chawngtlai khuaa sak hi Village Level Development Program (VLDP) hnuaia Entry Point Activities (EPA) project kalpuina khaw 6 zinga 1 a ni a. Chawngtlai khaw mipui ten puantah an zirna hmunpui atana ruahman a ni. He project atan hian ₹9,77,280 dah niin, Centre sakna mai bakah puantahna khawl 8 leh puanbu kim, bungrua leh hmanrua chi hrang hrang te lei a ni.