LAWNGTLAIAH STATE ANTI-TOBACCO DAY HMAN NIIN, TOBACCO FREE YOUTH CAMPAIGN 3.0 HAWNNA NEIH A NI

2037/2025-2026

Lawngtlai, 31st October 2025 : Vawiin khan Mizoram State Anti-Tobacco Day Vawi 12-na hmanna neih niin,   Lawngtlai District Tobacco Control Cell (DTCC) buatsaih a   ‘Tobacco Free Youth Campaign 3.0’  hawnna chu  CMO Conference Hall- ah neih a ni a. Senior Medical Officer Dr.Paul Lalchungnunga chuan thalaite zuk leh hmuama an fihlim theih nana beihpui thlak tur, “Tobacco Free Youth Campaign (TFYC) 3.0” chu a hawng.

Dr. Paul Lalchungnunga chuan zuk leh hmuam lama danglamna siamtu leh a tha zawnga nghawng a awm ngei theih nan ‘Tobacco Free Youth Campaign 3.0’ lawm tak a a hawn thu a sawi a.Zuk leh hmuam hian mihring nunphung  nasa tak a ti danglamin, rilru leh taksaah harsatna tam tak a thlen thin a ni, a ti a.  Tunhma  pi leh pute hunah kum upate zingah zuk leh hmuam ti thin tam tak an awm a, tunah chuan kum upa lam te ai mahin thalaite zing ah zuk leh hmuam ti an tam ta tial tial tih a tarlang a. Hei hi thil intihhmuh tha lo tak mai niin, thil  changkang lo a ni tih hriat thar a hun tawh hle a ti. Dr.Paul Lalchungnunga chuan zuk leh hmuam ti te nun hi a chep tulh tulh tawh a, a ti ve lo te tan hnawksak an ni tawh a, punpuina hmunah pawh khap zel a ni tawh a ni, a ti. Midangte tan hnawksak nih tum lova, kan lo nghei thei lo anih pawha  inthiarfihlim  hram hram zel chu changkanna tha a nih thu a tarlang. 

Dr. Paul Lalchungnunga chuan zuk leh hmuam ti thin te  pawhin sim tuma theihtawp chhuah a tul a, a la ti ve lo te pawhin tih loh tum a, mahni hriselna ngai pawimawh tur leh; zuk leh hmuam hian nasa takin hriselna a nghawng thei tih hre reng tur leh zuk leh hmuam laka fihlim turin  kalkhawmte  leh Lawngtlai mipuite a sawm nghal bawk.

Kum tinin ‘World No Tobacco Day’  hi May  ni 31 –  ah khawvel huapin hman thin niin,  Mizoram hi State mal anga ‘Anti Tobacco Day ‘ nei awmchhun an ni a . Mizoram State Anti-Tobacco Day-  hi Kum 2014 atangin kum tin thupui hrang hrang neiin  September ni 11- ah hman thin ani a, harsatna   awm avangin kuminah chuan  October  ni 31 – ah hman a ni.  Mizoram District khawpui  hrang hrangah he ni hi hman niin,  hemi rual hian ‘ Tobacco Free Youth Campaign 3.0’  hawnna an nei nghal  a ni.

Lawngtlai District Tobacco Control Cell (DTCC) te hian April, 2024 – September, 2025 chhung khan  zirna In hrang hrang- 22 ah ‘Awareness Campaign’ an nei a, training vawi – 7, ATS Drive (sec 4, 6 a&b) vawi-  52 nei tawhin,  mi-  11 hnen atangin dan bawhchhiat avanga an sum hmuh zat chu Rs 1,850 a ni. Hemi bakah hian Tobacco Cessation Clinic – kalpui niin zuk leh hmuam nghei duh mi-  462 an awm mek bawk a ni.

Mizoram State Anti Tobacco Day  leh Tobacco Free Youth Campaign 3.0 – hawnna inkhawm hi Dr. Isaac  Lalnunpuia, Community Health Officer, chuan kaihruaiin, Anti Tobacco Squad member , MJA, LWA Gen.Hqrs, MHIP Sub-Hqrs Lawngtlai, LSA hruaitute bakah sawm bik te an tel thei a.PiH.Vanlalmuansangi, District Consultant, NTCP  chuan report tawi pein, Pu  Vanlalngheta, Counsellor, NTCP chuan  lawmthu sawina neiin  hun a khar.